Manipur buaina avangin ZORO-in Zofate inrawnkhawmna a butsaih
Zo-Reunification Organisation (ZORO) chuan Manipur state chhunga Meitei leh Zofate inkara buaina awm chungchangah Zofate inrawnkhawmna Dawrpui Multipurpose Hall, Aizawlah an buatsaih a, political party hrang hrang aiawh, NGO hrang hrang aiawh leh kohhran aiawhte an tel.
Inrawnkhawmnaah hian Manipur tualchhung buaina-a Zofate tawrhna chu pawi an tih thu te, Zofaten chhawmdawl an ngaih thute leh khawvel hmun hrang hranga Zofate ṭanrual a ngaih thute an sawi hlawm a, resolution panga an pass.
Resolution an pass-te
▶ Manipur a Meitei leh Zofate inkar a tualchhung buaina chhuaka Zofate tawrhna hi kan dem in kan duh lo hle. Hetiang tualchhung buaina, a bikin chak lo zawk hmeichhia leh nunau pawisawi loin an tawrhna hi kan dem takzet a, thleng nawn tawh lo se kan ti.
▶ Manipur-a Meitei leh Zofate inkara tualchhung buaina hi ring lo miten Kristian an tih duhdahnaah kan ngai. Hetiang hi India ram sakhaw zalennaah chuan thleng nawn tawh suh se.
▶ Manipur-a Meitei leh Zofate inkar a tualchhung buaina avanga Zofa nunna chân te, hliam tuar te, in leh lo chânte leh biak-in an tih chhiatte zangnadawmna Manipur sorkarin a pek hi kan phut tlat a ni.
▶ Manipur sorkarin kawng hrang hranga Zofate pawi a khawih hi ram chhung leh ram pawn thleng pawha puanzar leh siamṭhata a awm theih nan ZORO-in phungbawm sawmin hma la se la, hemi chungchang hi United Nations Organisation (UNO)-ah thlen ni rawh se.
▶ Manipur tlangram hi Zofate luah ram a ni a, a ram neitu chu Zofate (Indigenouse People) kan ni. Chhuanlam hrang hrang hmanga Manipur sorkarin Zofate in leh lo chhuhsak tum a, hma a la hi kan duh loin kan dem takzet. Zofaten an hmakhua ngai a, hma a lakna peaceful tribal solidarity march an buatsaih avanga tharum thawha Zofate an bei chiam hi hriatthiam har kan ti hle. Manipur sorkar hian Zofate hi an ram chhuhsak a tumna chiang tak a ni. Manipur a Zofate hian Manipur sorkarah him loin an in hria a, chuvangin an himna turin rorelna hranpa India sorkarin a pek kan phut tlat a ni.