Lalduhoma leh K Sapdanga'n thu an sawi

ZPM chuan nimin khan an pisa-ah chhung inkhawm an hmang a, ZPM leader Lalduhoma leh working president K Sapdangate'n thu an sawi.

Lalduhoma chuan, kum 131 kalta - kum 1892 khan Culcutta-ah Chin Lushai Conference neih a nih thu sawiin, "Chutah chuan kan hnam chungchang hi an lo ngaihtuah tawh. Zo hnahthlak hrang hrangte zàikhatah luanga rorelna pakhat hnuaia awm turin ruahmanna an lo siam tawh a, mahse, a tlang zo lo kha a pawi takzet a ni," a ti.

Mizoram ti loa, Zoram People's Movement an tihna chhan sawiin ZPM Leader chuan, "Zo hnahthlak hrang hrangte inpumkhata kan awm theihna leh pawm tlan theihna turin he movement thlir phak hian party hming kan hotute’n an phuah a ni," a ti a, a tawrh hrehawm mah se, Pathian hian hnam anga dinchhuahna turin Zo hnahthlakte chunga thil hrang hrang lo thleng ṭhinah hian tum a nei nia a rin thu a sawi.

ZPM working president K Sapdanga chuan, tunlai Mizoram politics-a chanchin sawi tam ber chu ZPM chanchin a nih thu sawiin, "ZPM thli tleh hi eng hun aṭanga tleh ṭan nge rin thiam a har rualin, thli sulhnu langsar taka kan hmuh leh hriatfiahna chiang tak chu Lunglei Municipal Council inthlan kha a ni awm e," a ti.

K Sapdanga chuan ZPM chu inti Kristian bik, inti kohhran bik, inti Pathian thuawih bik leh chu chu chapopui ta viau anga puh an nih reng thu sawiin, "Kan president te, kan chief ministerial candidate-te pawh kohhran upa mìn an nih vangte pawh a ni ang," a ti a, an lakah mi thikthu a chhiain, beiseina an nei sang bik nia a lan thu a sawi.

Manipur-a Meitei leh tlang mite buaina chungchang sawiin K Sapdanga chuan, "Manipur-ah Zo hnahthlak unaute’n buaina nasa tak an tawk mek tih kan hria a, a phena thil inphum lian tak nia lang chu Kristiante nekchepa nek ral tumna a tel nasa hlein a lang. Kan unaute manganna hriain kan Chief Minister hoin Mizoram sorkarin chhanhimna kawng an zawng tih thawmte kan lo hria a, kan thlawp. Party anga ṭangkaina kan neih phawt chuan kan inrin reng thu sorkar hnenah pawh kan thlen tawh," a ti.