Manipur-a tangkhang mi 52-te Lengpui Airport-ah hmuah an ni

Manipur tualchhung buaina vanga Mizoram mi leh sa Manipur-a tangkhang zinga mi 52 chuan Mizoram sorkar hmalaknain nimin khan thawlhtheihnain Lengpui Airport an lo thleng a, minister Lalrinawma leh mi pawimawh dangte'n an lo hmuak.

Tangkhang lo hawte pual hian Lengpui Airport-ah inkhawm tawi buatsaih a ni a, minister Lalrinawma chuan Manipur-a chi leh chi inkara buaina chhuak hian Mizoram mipuite a barakhaihin an rilru a tihnat thu a sawi a, "Buaina chhuah ṭantirh khan sorkarin theihtawp chhuahin hma a la nghal a, chief minister Pu Zoramthanga pawhin Manipur Chief Minister be nghalin, remna leh muanna Manipur-ah a awm theih nan theihtawp chhuah a inhuam thu a han hrilh. Chu mai ni loin Union Home minister Pu Amit Shah pawh be nghalin theihtawp chhuah turin a ngen bawk," a ti a, Mizoram sorkarin Mizoram mi leh sa Manipur-a awmte lakchhuah dan tur nasa takin a ngaihven nghal niin a sawi.

Lalrinawma tarlan danin, tangkhang haw duh in hriattir mi 196-te thlawhtheihna ticket laksak an ni a, May 7, Pathianni zing lam dar 1:40 khan Imphal chhuahsanin tluang takin zirlai 50 chu thawlhtheihnain Guwahati hruai thlen an ni.

Guwahati Mizoram House-a an chawlh hahdam hnuah Pathianni vêk, tlai dar 5 khan zirlai 25 chu Mizoram lam panin bus-in an chhuak leh a, zirlai 25 dangte chu kawng dangin Mizoram an rawn pan ve leh a ni. Lengpui Airprt-a lo hmuah mi 52-te hian May 7, Pathianni tlai dar 4: 10 khan Imphal chhuahsanin Kolkata an thleng a, nimin chawhma dar 10:30 khan Kolkata aṭangin Mizoram an rawn pan leh a ni.

Nimina Mizoram rawn thlengte hi RIMS-a zirlai mi 37 leh chhan hrang hrang vanga Imphal-a tangkhang mi 15 an ni a, May 7, Pathianni tlaia Guwahati aṭanga bus hmanga rawn haw mi 25 pawh Aizawl an lo thleng tawh.

Manipur mi leh sa, an himna zawnga Manipur chhuahsana lirthei hmanga Mizorama rawn tlanchhiate chu theihtawp chhuaha lo dawngsawng turin sorkarin DC tinte a hriattir tawh.

He hunah hian MLA ZR Thiamsanga, Central YMA president R Lalngheta leh tangkhang rawn haw zinga AMSU president Immanuel Lalngaihmanawmate pawhin thu an sawi.