LC leh VC inthlan lo awm turah Party-te'n beiseina an nei sang
August 27, 2020-a village council (VC) leh local council (LC) inthlan turah political party hrang hrangte'n beiseina sang tak an nei hlawm. MNF party chuan Sinlung Hills Council (SHC) area-ah HPC an thawhpui dawn a, party dang chuan tun dinhmunah chuan thawhpui neih an tum rih lo.
Vanglaini palaiin a kawmnaah political party hrang hrang hruaitute chuan, VC leh LC inthlan turah seat tam tak lâk an inbeisei thu an sawi vek a ni. MNF vice president Vanlalzawma chuan, majority an neih ngei an beisei thu sawiin, "VC leh LC awm zawng zawng chuh vek kan tum. Chutih rualin, SHC huam chhung bikah HPC-te nen kan thawkho ang. Seat kan lâk hnem ber kan inring," a ti.
MNF leh HPC-te hian nimin khan SHC link office, Aizawlah thawhhona thutlung an ziak a, an thawhho dan tur chu khua/venga party pahnihte inbiak rem danah an dah. Mizoram Pradesh Congress Committee (MPCC) treasurer Zodintluanga Ralte chuan, VC leh LC awm zawng zawng chuh an tum thu sawiin, "Seat la tam ber kan nih ngei ka ring. A chhan chu, MNF MLA ṭhenkhatte hi tun ṭuma an tlin aiin an tlak ṭuma an vote hmuh a tam zawk. Chuvangin, LC leh VC-ah hnehna kan chang ang," a ti a; political party dang thawhpui an tum loh thu a sawi.
ZPM president Lalliansawta pawhin seat tam tak lâk ngei an beisei thu sawiin "Headquarters lam aṭang chuan VC leh LC a tam thei ang ber chuh tur leh thawhpui nei lo turin thutlukna kan siam. Chutih rualin, candidate neih leh neih loh chu unit-te dinhmun azir a ni ang a, anni'n thutlukna an siam ang," a ti. BJP Mizoram Pradesh president Vanlalhmuaka chuan, thawhpui neih leh neih lohah thutlukna an siam loh thu sawiin, "Kan tum ber chu a tam thei ang ber inthlan chuh a ni. Mizorama kan unit zawng zawngte chu inthlan chuh turin kan ti a, thawhpui neih leh neih loh chu an thu-ah kan dah," a ti a, seat ṭhahnem tak an lâk ngei an beisei thu an sawi.
Vanglaini palai zawhna PRISM president Vanlalruata'n a chhan danin, an party chuan VC leh LC inthlana candidate neih leh neih loh chungchangah thutlukna an la siam lo.
MPC party chuan thuchhuah siamin, VC leh LC inthlan lo awm turah an party mite chu inthlan hmachhawn ṭheuh turin an chah a, party thawhpui neih emaw, party mala din chungchangah unit tinte chu zalenna an pe tih an tarlang. Tarlan tawh angin, State Election Commission chuan August 5, Nilaini khan VC leh LC inthlan hun atan August 27, 2020 ruat a nih thu a puang a, inthlan chuh tumte tan August 11 thleng hming pek luh theih a ni.