Covid-19 vei mi 33 hmuh belh Zingah ZMC-a nurse 1 a tel
August 5, Nilaini khan Zoram Medical College (ZMC), Lunglei Civil Hospital (LCH) leh Rapid Antigen Test (RAT) hmangin Covid-19 hripui vei mi 33 hmuh belh a ni a, an zingah hripui vei enkawltu nurse pakhat a tel. Mizorama Covid-19 vei hmuh tawh zat chu mi 537 an ni.
Nilainia ZMC laboratory-a mi 175 swab sample endik aṭangin hripui vei mi 31 hmuh belh a ni a, mi 144 erawh chuan Covid-19 an vei lo a, an zingah hripui vei endik nawn pakhat a tel. LCH laboratory-ah mi 34 endik aṭangin mi pakhat leh RAT hmanga mi 44 endik aṭangin mi pakhat Covid-19 vei hmuh chhuah a ni bawk.
ZMC-a Covid-19 vei hmuh chhuah thar mi 31-te chu mipa 30 leh hmeichhia pakhat, kum 26-60 inkar an ni a, Aizawl district-a mi 29 leh, Kolasib leh Saitual district-a mi pakhat ve ve an ni. SRH-ZMC Covid-19 Bulletin chuan, mi 31 zinga 21 chu state dang aṭanga rawn lut an nih laiin, mi 10-te chu Mizoram chhunga mi dang aṭanga kai (positive contact) an nih thu a tarlang.
Sorkar thuchhuah tarlan danin, Aizawl district-a hripui vei hmuh tharte chu - Assam Rifles mi 18, BSF sipai pakua leh Assam Regiment sipai Mizo pakhat leh nurse pakhat an ni. Mizo sipai Assam Regiment-in harsatna (symptom) a nei a, mi dang zawngin an nei lo.
Covid-19 vei hmuh thar zinga mi, nurse hi kum 31 mi, State Referral Hospital (ZMC)-a thawk, hripui vei enkawltute zinga mi a ni a, hripui vei a enkawlna aṭanga kai nia hriat a ni. Assam Rifles leh BSF sipaite chu tun hnaia state páwn hmun hrang hrang aṭanga rawn lut, quarantine facility-a awm lai vek an ni.
Kolasib district-a awm Covid-19 vei hmuh thar chu hnam dang sipai, mipa kum 27 mi, Assam aṭanga lo lut a ni a, Saitual district mi hmuh thar chu mipa kum 33 mi a ni. An pahnih hian quarantine facility-a awm lai, symptom nei lo ve ve an ni. LCH laboratory-a TrueNAT hmanga Covid-19 vei hmuh chhuah mi pakhat chu mipa kum 25, tun hnaia Assam aṭanga rawn lut a ni a, Eklavya quarantine centre-a awm lai niin, symptom a nei lo.
Nilaini vêka RAT hmanga Covid-19 vei hmuh thar pawh sipai kum 29 mi, Assam aṭanga rawn lut a ni a, Champhai district-a awm, quarantine facility-a awm mek, symptom nei lo a ni.