Manipur-a buaina chhuak avangin Zo hnahthlak mi 2,761 Mizoramah an rawn tlan chhe tawh

Nimin tlai dar 6 thleng khan Manipur buaina avangin an sahimna zawngin Zo hnahthlak mi 2,835 Mizoramah an rawn tlanchhe tawh. Hei hi sorkar chhinchhiah dan a ni a, chhinchhiah lohte pawh an awm rin a ni.

Raltlante hi khaw hrang hrangah awmin, raltlan tamna ber district Saitualah chuan raltlan 1,016 an awm tawh. Raltlan tam zawk chu hall-ah dah an ni a, khaw ṭhenkhat chuan raltlan ho awmna hmun tur sak an tum. An chhungte bel pawh mi eng emaw zat an awm.

Khaw ṭhenkhatah chuan raltlante hi khawtlangin an eitur an ngaihtuah sak. Raltlan ṭhenkhat erawh anmahniin an in ngaihtuah chawp a, an bungraw rawn ken hmangin rawng an inbawl a ni.

Raltlan an pun zel avangin district bawrhsap ṭhenkhat chuan raltlante buaipui dan tur chungchangah hriattirna an ti chhuak.

Aizawl DC chuan Manipur aṭanga Aizawl district rawn pan mek leh thleng tawhte an awm avangin veng/khaw tina village/local level disaster management committee leh committee hnuaia team hrang hrangte in tih nun vek tur a nih thu a tarlang.

Manipur aṭanga raltlan chhungte belh tur nei lote awm lailawkna turin mahni veng/ khaw chhungah hmun­hma lo buatsaih lawk tur a nih thu tarlangin Aizawl DC chuan, "Chhungte belh tur neite leh nei lote pawh chhinchhiah vek tur a ni," a ti.

Aizawl DC chuan VLDMC/LLDMC-te chu mahni veng/khuaa raltlan mikhual an neihte format pek chhuah tawh hmangin lut thar an neih apiangte ni tin tlai dar 2 hmain mahni Bialtu Zonal Officer hnenah emaw, VLDMC/LLDMC whatsapp group-ah report ṭhin turin a hriattir.

Champhai DC pawhin thuchhuah siamin, raltlante ngaihvena, a ṭul anga lo chhawm­dawl turin an district khaw tin village council-te a ngen.

Bawrhsap chuan, Cham­phai district khua/ veng chhunga Manipur mi leh sa awmte'n harsatna an tawh loh nan leh boruak ralmuang a awm zel theihna tura theih­tawp chhuaha hma la turin VC, Sub-Headquarters YMA, Champhai leh branch YMA tinte a ngen a, "He tualchhung buaina avang hian mi tinte social media hman dan kawngah fimkhur lehzual a ngai. Hnam leh hnam inkara buaina chawkchhuak thei leh boruak duhawm lo thlen thei zâwnga thu engmah post lo turin mipuite kan in ngen a ni," a ti.

Champhai district-a VC tinte chu ni tin raltlan an neih dan kimchang chawhnu dar 2 ral hmaa bialtu BDO hnenah thehlut ṭhin tur leh, BDO tinte pawh report an dawnte chawhnu dar 2:30 ral hmaa DC Office-ah thehlut ṭhin turin a hriattir.