ASF vangin Ngur khuaah vawk 67 an thi tawh

Champhai district AH&Vety officer Dr B Lallawmsanga hoin nimin khan Ngur Model Village Office-ah Ngur khuaa vawk pûl hri, African Swine Fever (ASF) leng mek a darh zel tur ven kawnga hmalak dan tur sawiho a ni a; nimin thleng khan Ngur khuaah ASF vangin vawk 67 a thi tawh tih tarlan a ni.

Ṭhukhawm chuan Ngur khuaa vawk damlo mekte'n vawk dangte hri an kai darh zel loh nan suat vek a, mumal taka phumbo vek ni se, an ti a, a ranglama hma la tur leh a ṭul angte buaipui nghal thuai turin VC leh AH&Vety department chu ruat an ni.

Nimin thleng khan Ngur khuaah hian ASF vangin vawk 67 a thi tawh a, AH&Vety department hmalaknain vawk damlo pasarih suat a ni tawh. Tun dinhmunah vawk damlo eng emaw zat an awm mek.

Ngur khua hi May 4, 2023 aṭanga thu leh awm hma atan vawk hrilenna hmun, infected area-ah puan a ni a; vawk lakchhuah emaw, lakluh emaw phal a ni lo. Vawk thi reng reng paih mai loin chinai (lime) nen thuk taka phum tur a ni a, vawk talh leh vawk sa zawrh khap tlat a ni.