Kum 10 aia rei a zawna hruaitu nih theih lohna Apex Bank hruaitute'n paih turin sorkar an phût

Mizoram Cooperative Apex Bank Ltd. Board of Councillor-te chuan nimin khan an office-ah thuthar thehdarhtute kawmin, a zâwna kum 10 aia rei hruaitu nih theih lohna dan paih tura Mizoram sorkar an phût thu an sawi.

Apex Bank chairman T Lalmuanpuii chuan, State Level Cooperative Societies Coordination Committee-in Mizoram Cooperative Society chuan Mizoram Co­operative Societies Act section 53 hnuaia co­operativa society hruai­tute kum 10 aia rei hruaitu nihna an chelh theih lohna chu paih turin sorkar an ngen thu sawiin, "He proviso hi cooperative hmasawnna daltu niah kan ngai," a ti.

T Lalmuanpuii chuan proviso paih chung­chang chu State Level Co-operative Socie­ty-te ngaihdan hre duhin RCS chuan State Level Cooperative Society zawng zawngte an khawmpuiah ngaih­tuah tura a tih thu sawiin, "Society zawng zawngin kum 2016 khan ngaih­tuahin, paih an duh vek," a ti a, society-te duh ang ngeia proviso chu paih ngei an phût thu a sawi.

An thil phut chung­changah chief minister Zoramthanga pawh an hmuh tawh thu sawiin T Lalmuanpuii chuan, "A thurâwn angin Mizoram hmun hrang hranga he dan paih duhtu society-te signature leh seal la khawmin, kan thehlut a ni. CM thurâwn anga kan hmalakna kan ngai chang mek. He dan ṭha lo hi state level society leh primary cooperative society-te duh dan ang ngeia inthlan hun hma ngeia paih a nih ngei kan beisei," a ti.

Apex Bank Chairman chuan inthlan a hnaih tawh thu sawiin, "He dan ang hi chuan primary level aṭanga state level hruaitu kum 10 lo ni tawhte chuan an chuhve thei dawn lo. Society lo hmangaiha khaiding hram hram tute'n an chuhve thei lo tihna a ni," a ti a, he dan hi ṭhiah a nih loh chuan inthlang thei loa awmin court-ah zualkote pawh an awm ngei a rin thu a sawi.

T Lalmuanpuii chuan political party hrang hrang aṭangin AMC leh MLA inthlana candidate tura sawmna a dawn ṭhin thu sawiin, "Cooperative society hi ka rawngbawlna tura ngaiin ka lo hnawl ṭhin a ni. Tunhnaia MLA a in candidate ka tum anga thuthang awm mek hi thu belhchian dawl lo a ni. Khawi party aṭang mahin kumin inthlan lo awm turah MLA chuh ka tum lo," a ti.

Kum 2011-a Apex Bank vice chair­man nihna a chelh aṭangin bank accu­mulated loss thai bo a ni ṭan nia sawiin T Lalmuanpuii chuan, "Kum 2013 aṭangin chairman nihna ka chelh ṭan a, board member dangte leh thawktute dangte nen thawhhona ṭha tak kan nei," a ti a, an bank chuan kum tinin kawng hrang hranga hma a sawn zel thu a sawi.