Mizoram Mega Job Fair buatsaih: Dy CM-in Mizo ṭhalaite duhsak turin a ngen; hnathawh tur 1,800 chuang chhawpchhuah a ni
Deputy chief minister Tawnluia chuan nimin khan Millennium Centre chungzawlah Labour Employment, Skill Development & Entrepreneurship (LESDE) department buatsaih Mizoram Mega Job Fair vawi 1-na a hawng. Dy. Chief Minister chuan, Placement Agency kalkhawmte chu Mizo ṭhalai hna nei lote danin a phal chinah duhsak turin a ngen.
Tawnluia chuan, Covid-19 hripui leng vangin kum hnih chhung hna lak a khaihlak hnuah sorkarin ṭhalaite hmakhua ngaiin zawi zawiin hnalak a kalpui mek tih a sawi a, "Amaherawhchu, tun dinhmunah ṭhalai hna nei lo zawng zawng daih khawp a awm lo a, sorkar pawn lama hna ngelnghet hmu thei turin ṭhalaite'n ṭan in lak a ngai. Placement agency-te pawh Mizo ṭhalai hna nei lote hi danin a phal chinah duhsak turin ka ngen che u a ni," a ti.
Mizoramah ṭhalai lehkhathiam tam tak an awm thu sawiin Tawnluia chuan, "An tuina leh theihnate hmang ṭangkai turin sorkar hnain a daih tâwk lo a, sorkar pawn lama hna tam takte hi dinchhuahpui tham a ni. Ei leh bara intodelhna tur leh eizawnna kawng ṭha tak a ni," a ti a, fair chu ṭangkai taka hmang turin kalkhawmte a fuih a ni.
Deputy CM chuan ṭhalaite chu an hmaa hna chhawpchhuahte chhel taka thawk zel turin a chah a; skill development hmalakna hrang hrangah theihtawp chhuah tlân a nih chuan kum rei loteah ṭhalaiten ram an siam danglam ngei a rin thu a sawi.
Mizoram Mega Job Fair hawnna inkhawmah hian LESDE secretary Lalramsanga, director Angela Zothanpuii leh joint labour commissioner Dr JT Vanlalngheta ten thu an sawi. Fair hi vawiinah chhunzawma zawh a ni ang.
Mega Job Fair-ah hian ram pawn leh ram chhunga company-ten sector hrang hrang - financial institutions, banking, healthcare, services, automobile, IT, FMCG, tourism & hospitality, beauty & wellness etc. sawmkhawmin Mizo ṭhalai hna zawnglaite tan hnathawh tur 1,800 chuang an rawn chhawpchhuak a; EMPEX portal-ah hna zawnglaite inziahluhna hun hawn nghal a ni.