Manipur-a thil thleng chhuitu tur Kristian MP-te telna din rawt

Rajya Sabha MP K Vanlalvena chuan nimin khan prime minister Narendra Modi hnenah memorandum a thehlut a, Manipur-a thil thlengte chhuitu tur Kristian MP-te telna Joint Parliamentary Team din turin a ngen.

K Vanlalvena chuan memorandum a theh­luhah hian, May 3, 2023 aṭanga tun thlengin Manipur-ah Kristian biak-in 42 aia tlem lo tih chhiat a nih tawh thu a tarlang a, "Heng zingah hian tribal Kristian-te biak-in chauh tihchhiat a ni lo a, Meitei Kristian biak-in pawh paruk lai tihchhiat a ni. Manipur buaina hi Meitei leh tlangmite intihbuaina ringawt a ni lo tih hei hian a tifiah hle," a ti a; Manipur aṭanga Kristiante umchhuah tum an awm tih a chian thu leh hei hi India Constitution lungphum pawimawh pakhat sâwinghinna a nih thu a tarlang a ni.

May 5, 2023 zanah Assam Rifles duty-ten Chura­chandpur-ah civil mi pawisawi lo hmei­chhe pathum leh mipa pakhat an kahhlum thu pawh Prime Minister hnena memorandum a thehluhah hian tarlangin Rajya Sabha MP chuan, "Heng thil ṭha lo chi hrang hrang titu chhuichhuaha, hrem an nih theih nan Kristian MP-te telna Joint Parliamentary team din turin ka ngen che a ni," a ti.