Iron rod bûk dik lo dàwrte tarlang

All Mizoram Cement & Iron rod Dealers Association (AMCIRDA) chuan, tun hnaia iron rod leh cement zuar, Mizo hming hawha vai sumdawngte'n bûkna dik loh an hmante an enfiah a, bûk dik lo hmanga Mizo mipui buma rawktu eng emaw zat an man chhuak tih an tarlang.

AMCIRDA chuan dawr lian panga an endik a, chu'ngte chu - Chaltlanga T Dela Enterprise leh Midland Enterprise, Chanmari-a Sentei Enterprise, Falkland Venga Pekhluii Enterprise leh Lalkhawchhani Enterprise-te a ni.

T Dela Enterprise, Sentei Enterprise leh Pekhluii Enterprise-te chuan bûk dik loin an bungruate an hralh ngei tih an finfiah avangin dan anga hmalak a nih theih nan Legal Metrology hnenah an hlàn a; Mizo mipui bumna hmanga min rawktute an nih avangin a na thei ang bera hrem turin Legal Metrology an phût a ni.

Dawr panga an endik zinga mi, Midland Enterprises chuan an dawra mi ni lo, mi dang dawra mi a la chhâwng tih hriat a nih thu leh a rod kawl lai (a rih zawng an hriat rûk) chu ni se a bûk a dik lo ngei tura an ngaih thu an sawi a; "Lalkhawchhani Enterprise hi hrilhtu an nei nge, kan bungraw order rawn thlen ngam loin an tlan lêt leh a, kan man ve thei ta lo," an ti.

March 2019 khan Central YMA nen ṭang dunin iron rod lei dan dik chart siamin, dawr tinah târ a ni tih sawiin AMCIRDA chuan, "A tìr lamah chuan a ṭha viauah kan ngai a, hun a lo rei a, iron rod size dik thlap, bûk dik taka hralh chhuah kha Mizo hming hawha vai sumdawng sum sênna thuah hnih neite tan a hlâwk loh avangin iron rod size tê, BSI standard tling lo la lutin, bûk loin a tlâwn hisâpa hralhin inbumna an kalpui leh a ni," an ti a; fimkhur turin mipui an chah.

AMCIRDA tarlan danin, dan dik takah chuan iron rod milimetre 10 (3 suit) chu a maximum weight kg. 7.4 ni tura ngaih a ni a, chutih laiin, Mizo hming hawha vai sumdawngte chuan kg 6.1 vel chiaha rit iron rod chah lûtin, kg. 7.4 angin an hralh ṭhin. Legal Metrology-in kum 2019 tawp lama iron rod zuarte zawm tura thupek a chhuah angin, iron rod dawr­te chu digital weight hmang vek tura tih an ni tih sawiin AMCIRDA chuan, "Digital weight hmang leh hmang lote dawrah bungrua lei dawn chuan, mahni chhia leh ṭha hriatna hmang thiam nghal mai turin mipui kan chah a ni," an ti.