KHAWTHLIR

Zirlai training

Mizoram Forensic Science Laboratory Directorate-ah SOBAS, Adamus University, Kolkata-a B.Sc fourth semester zirlai 10 leh asst. professor pahnih chuan May 8, 2023 aṭang khan training an nei a, department hrang hrang aṭangin theoretical & practical zirtirna neih pui an ni dawn. Training hi May 12, 2023 thleng an nei ang.

Hnuchhui zir

Aizawl SP Zarzoliana Vanchhawng chuan May 8, Thawhṭanni khan SP conference hall-ah Aizawl DEF hnuaia headconstables (HCs) 25-te tana buatsaih 'Training of HCs as Investigation Officers (IOs)' a hawng. Training hi nimin khan chhunzawm niin, investigation procedure, investigation of theft cases, evidence collection, search & seizure, evidence act, adt. te an zir a ni.

Kawng siam dawn

Aizawl Traffic SP chuan hriattirna ti chhuakin PWD-ten NH-54 Hunthar aṭanga Zarkawt Thlanmual peng chu vawiin aṭangin May 15, 2023 thleng, ni tin zing dar 9:30 aṭanga tlai dar 5 inkarah patch repair & seal coat hna an thawh dawn avangin helai kawng hi a chanve khar a ni dawn tih a tarlang. Hnathawh tibuai thei turin hnathawhna huam chhung kawngpuiah lirthei leh bungrua dah a khap.

Online-a tui bill pek dan zirtir

Khawzawl PHE Watsan Division EE Liantluanga Chohte hoin nimin khan a pisa-ah Khawzawl District Consumers Union leh MJA member-te online hmanga tui bill pek dan zirtir an ni. MCU hruaitute chuan online hmanga tui bill pek dan uar zawka inhrilhhriatna buatsaih ṭul an tih thu an sawi.

BDA ṭhukhawm

Bamboo Development Agency General Body meeting vawi 24-na chu nimin khan Commerce & Industries minister Dr R Lalthangliana pisaah an ṭhu a, hmalakna leh hmachhawp hrang hrang an thlirho. He hunah hian CI secretary Madhup Vyas, BDA ececutive director Florence Zotluangpuii bakah Horticulture, Finance leh Planning depart­ment aiawhte an tel.

Password sawi lo turin hriattir

Mizoram Police chuan thu­chhuah siamin, mobile phone hmanga mi biakin eng password mah hrilh lo turin mipuite an hriattir.
Mizoram Police chuan password lehkhaah ziaka chhinchhiah loh tur a nih thu tarlangin, "I thluak kha password chhinchhiah nan a ṭha ber tih hria ang che. Password-ah nangma tana chhinchhiah awl si, midang tana rin dik har si hmang ṭhin rawh," an ti.

Traffic Police training buatsaih

Mizoram hmun hrang hranga Traffic Police-te tan May 8, Thawhṭanni khan DGP conference hall-ah 'Motor Vehicle Act/Rules and its enforcement' tih thupui hmangin training neih a ni a, DGP Devesh Chandra Srivastva in a hawng. Training-ah hian Aizawl Traffic Police mi leh sa 60 bakah, district hrang hranga traffic police-te online hmangin an tel a ni.