June 1 - August 30, 2023 chhungin SEDP phase-II sem zawh beisei a ni

Aizawl District Level SEDP Committee chu nimin khan bawrhsap Dr Lalhriatzuali Ralte hoin DRDO conference hall-ah an ṭhutkhawm. SEDP Phase-II first installment chu June 1-30, 2023 leh second installment chu August 30, 2023 hmaa beneficiary-te bank account-a lut tura beisei a nih thu tarlan a ni.

Ṭhutkhawma tarlan danin, SEDP Family Oriented ṭanpuina dawng turin Aizawl district-ah mi 16,800 thlan an ni dawn a, hemi atan hian Rs 84,00,00,000 ruahman a ni. Pawisa hi installment hniha pek tura ruahman niin, SEDP Phase-II first installment hi June 1-30, 2023 chhunga beneficiary-te bank account-a lut tura beisei a ni. Second installment pawh August 30, 2023 hmaa lut tura beisei a ni bawk.

SEDP ṭanpuina dawng turte hi Village Level SEDP Committee-ten District Level Committee-ah May 12, 2023 thleng an thehlut thei a ni.

He hunah hian SEDP Phase-I kalpui dan thlirlet nghal a ni a, department hrang hrangin SEDP sem chhuah tawha anmahni line dept. beneficiary-te an vilzui dan leh beneficiary tiṭhate tan lawmman siam a nih tur thu tarlan a ni bawk.