Child Development Centre hawng

Aizawl North-II bialtu MLA Dr Vanlalthlana chuan nimin khan Haulianthanga building, Ramhlun South-ah Child Development Centre, Mizoram a hawng.

Dr Vanlalthlana chuan naupang taksa leh rilru lama harsatna neite enkawlna tur din a ni chu lawmawm a tih thu sawiin, Child Development Centre-a thawkte chu hmangaihna tak tak nena naupang harsatna neite enkawl a, lo kuangkuah zel turin a chah.

Child Development Centre hi kum 2021-ah din niin, Dawrpuiah bulṭan a ni. Tunah hian thawktu mi 20 vel awmin, tun thlenga naupang enkawl ngai inziak lut tawh chu mi 1,300 vel an ni. Centre hian mi thiam kaltlangin thiamna hrang hrang hmangin naupang an enkawl ṭhin.

Naupang taksa leh rilru lama harsatna neite leh an chhungte chu kawng engkimah chhawmdawlin, an harsatna sutkian pui a, kawng tinrenga hmasawnna an neih theih nan leh naupang dinhmun zirchiangin enkawlna hna an thawk ṭhin a ni.