Harsatna leh hun khirh tak avangin thinlungah Zofate kan insuihkhawm zel - PC Sr. V President

PC Party Action Committee chu May 8 Thawhṭanni an office lailawkah an ṭhukhawm a, an chairman Lalrinzuala Chawngthu, sr. vice president chuan tunlaia Manipur tualchhung buaina chungchang sawi chhuakin, "Harsatna leh hunkhirh tak tak avangin thinlungah Zofate kan insuihkhawm zel," a ti.

Lalrinzuala Chawng­thu chuan tuna Manipur hi a pian hmain kan unau chengte hi Zofate thlang tlak khan heng lai velah hian an inbengbel nia sawiin, "A ram neitu, leilungfa an ni. India, Myanmar leh Bangladesh ramahte Zofate hi ṭhendarh kan ni. Kan chenna a zirin kan zia leh rilru danglam mah se, hun khirh leh harsatna hrang hrang avangin unau kan insuihkhawm chho zel," a ti a, Mizorama Zofaten inpui chan changa kan unaute zai ngai taka kan dawm zel chuan kan inunauna a thûkin a nghet telh telh tur thu a sawi.

Brig T Sailo kha a Chief Minister laiin Silchar buaina chhuakah amah ngei a zuk kal tih sawiin PC Sr. Vice President chuan, "Tripura buainaah Dr Kenneth Chawngliana a tir bawk. Pu Lal Thanhawla pawh Mizoram pawna Zofate thlamuanpui a ni ṭhin. Pu Zoramthanga hruai sorkar pawh Mizoram pawna Zofate tan a thlamuanthlak rih. Kohhran hrang hrang te, NGO leh political party hrang hrang kan inlungrual ṭhap hi thil lawmawm tak, hnam dingchhuak tur zia a ni," a ti.