Manipur buainaah theihtawp kan chhuah - Mizoram BJP

Mizoram BJP chuan May 8, Thawhṭanni khan an pisa-ah political session an hmang a, thusawitu an vice president R Vanramchhuanga chuan Manipur buaina chungchangah theihtawp chhuaha hma an lak thu a sawi.

R Vanramchhuanga chuan tunlaiin Manipur-a buaina chungchangah BJP Mizoram chuan Manipur-a Zo hnahthlak tam tak Imphal-a tang mekte tan theihtawp chhuahin hma an lak thu sawiin, "Manipur buaina hi a bulthum hre lote'n BJP leh Pu Modi-a beih nan an hmang hi a dik lo hle a ni. Manipur a Congress Sorkar laiin Communal Violence a thleng fo tawh a, Congress Sorkar hunlai a Communal Violence avanga nunna chân an awm nual tawh a nih kha, chung te chu Congress thil tih kan ti ngai chuang lo a ni," a ti.

MBJP Vice President chuan communal violence chu India ram hmun hrang hrangah a thleng tawh ṭhin tih sawiin, "Indira Gandhi a thih hnuah, Sikh mi tam tak thah an nih khan Congress thil tihah kan sawi ngai lo. Graham Stain-a te pafa hal hlum an nih khan Congress sorkarna state a ni a, Congress thah kan ti chuang lo," a ti a, Mizoramah ngei pawh Bawngkawnah biak-in vawmchhiat a nihin Congress sorkar lai ni mah se, Congress-in an tihchhiatsak an tih loh thu a sawi.