Manipur-a buaina chhuak chungchangah Larsap leh MHIP hruaitute an inkawm

Governor Dr Hari Babu Kambhampati leh Mizo Hmeichhe Insuihkhawm Pawl (MHIP) hruaitute chu nimin khan Raj Bhavan-ah an inkawm. MHIP hruaitute chuan Manipur state buainaa hmeichhia leh naupangte dinhmun ṭha lo chungchangah chak zawka hma lak a nih theih nan President leh sorkar laipuiah nawr turin Larsap an ngen.

MHIP hruaitute chuan Larsap hnenah hian lehkha an theh lut a, President hnena an lehkhathawn pawh Governor hnenah hian thehlutin, President hmuh tura thlensak turin an ngen nghal a ni.

Lehkha an thehluhah hian Manipur state-a buaina chhuak chu pawi an tih thu te, buaina chhuak kara hmeichhia leh naupang pawisawi loten kut an tuar chu an dem thute leh a rang thei ang bera boruak ralmuang siam thuai tura central leh state sorkar thuneitute an ngennate an tarlang a ni.