Mizoram quota-a medical leh engineering line zir tur thlanna SMATEE exam tum an pung zel

Mizoram sorkar quota-a medical course leh technical course zir tur thlanna tur, State Medical and Technical Entrance Examination (SMATEE), 2020 exam tum an pung zel a, nimin thleng khan mi 1,552-in application form an thehlut tawh.

Higher & Technical Education (Technical Wing) aṭanga Vanglaini thu dawn danin, kum dangah chuan dilna form 1,500 vel siam ṭhin a ni a, copy 200-300 vel an hralh bàn ṭhin bakah, form thehlut lo te, thehlut zingah pawh exam lote mi eng emaw zat an awm ṭhin. Kuminah erawh chuan application form 1,700 chuang hralh chhuah tawh a ni a, nimin thleng khan mi 1,552-in an thehlut tawh a ni.

SMATEE 2020 application form hi August 15, 2010 thleng lak chhuah leh thehluh theih a ni a; chutih rualin, Covid-19 léng vangin SMATEE ṭan hun tur hriat theih a ni rih lo. SMATEE hmang hian Mizoram quota-a engineering leh medical course zir tur thlan a ni dawn a, Mizoram chuan engineering-ah seat 137 leh medical-ah seat 243 a nei a ni.

Kum dang aia SMATEE exam tum an tam chhan hi hriat ni chiah lo mah se,Mizoramah science zirna a tlem avang leh Covid-19 avanga state páwna zir tura chhuak ngam lo an tam vang nia ngaih a ni. Hetih lai hian, state quota-a MBBS, BDS leh homoeopathy doctor zir tur thlanna National Eligibility cum Entrance Test (NEET) chu September 2020 hian sorkar laipui chuan buatsaih a tum. NEET 2020 atan hian December 2019 khan application form tihfel a ni tawh a, May 2020-a exam tura ruahman ni mah se, Covid-19 leng vangin tun thleng exam theih a la ni lo. Mizoram chuan MBBS seat hi Zoram Medical College-ah 70, RIMS (Imphal, Manipur)-ah pasarih leh Agartala, Tripura-ah pathum, a vaiin seat 80 a nei a ni.