KHAWTHLIR

State Election Commission chuan thuchhuah siamin, August 27, 2020-a village council leh local council in­thlan turah August 5 aṭanga September 7, 2020 thleng Model Code of Conduct puan a nih thu an tarlang a, "Model Code of Conduct hian political party, contesting candidate leh mipui thlan tlin ram hruaitute leh inthlannaa inhnam­hnawih sorkar hnathawkte a huam," a ti.

Siaha District Level Standing Committee on Conduct of By-Election chu nimin khan additional DC B Lal­chhawntluanga hoin DC conference hall-ah an ṭhukhawm a, August 26, 2020-a Siaha North-I biala MDC by-election neih tur chungchang an sawiho. B Lalchhawn­tluanga chuan, tlawm­ngai pawl leh political party hrang hrang-te chu inthlanna felfai leh muan­awm a awm theih nan election official-te ṭawi­awm tlat turin a ngen a ni.

State Referral Hospital (SRH)-ah nimin khan Covid-19 vei mi pathum leh veia rinhlelh mi pathum dah luh an ni. SRH-ah hian hripui vei mi 40 enkawl mek an ni a; ICU-ah pathum, SICU-ah mi pahnih leh Isolation Ward-ah mi 35 an awm. ICU-a awm zinga pakhat chu ventilator hmantir zel a ni a, Isolation Ward leh SICU-a awmte'n harsatna lian tham an nei lo.

Mizorama quarantine centre hrang hrangah June 5, Nilaini thleng khan khung hran (qua­rantine) mi 1,755 an la awm. Aizawl district-ah mi 936, Champhaiah mi 46, Hnahthialah mi 22, Khawzawlah mi 12, Kolasib mi 246, Lawng­tlaiah mi 119, Lungleiah mi 190, Mamitah mi 58, Saitualah mi 16, Ser­chhipah mi 71 leh Siaha district-ah mi 39 an awm mek a ni.

Assam Rifles chuan nimin khan Vapar, Champhai district-ah dan loa Myanmar aṭanga thil lak luhte zawn beihpui an thlâk a, methamphetamine mum 3,00,000 manin, a neitua puh mi pakhat an man nghal. Methamphetamine hi tualchhunga hralhnaah chuan Rs. 3,00,000 hû a ni. Ruihhlo leh a neitua rinhlelhte chu Excise & Narcotics department hnenah an hlân.