LC leh VC inthlan turah kaihhruaina siam; Mask vuah lote'n vote thlak thei dawn lo

State Election Commission (SEC) chuan village council (VC) leh local council (LC) inthlan neih a nih dawn avangin August 14, 2020 aṭanga September 7, 2020 chhunga inkaihhruai tur an tichhuak. Inthlanah hian Covid-19 lêng vanga inkaihhruainate zawm tur a ni a, hmai tuamna (mask) vuah lote'n vote an thlak thei dawn lo.

Inthlan atana kaihhruaina tihchhuahin a tarlan danin, polling station leh a chhehvelah polling official, candidate leh election/polling agent leh mipuiin mask an vuah tur a ni a, eng lai pawhin physical distancing an zâwm tur a ni. Vote thlak turte'n polling booth an luh dawnah hand sanitiser-in kut an sil ngei tur a ni bawk.

Election campaign: VC leh LC inthlanah public meeting emaw, mipui pung khawm zawnga programme huaihawt phal a ni lo. District Magistrate-in Cr.PC Section 144 tlawhchhana mi panga aia tam punkhawm a khap chu khauh taka zawm tur a ni.

Nomination: Nomination file leh endik (scrutiny)-a tel zawng zawngte’n physical distancing (ft. 6 kar dana awm) an zâwm ngei tur a ni a, mask an vuah ngei tur a ni bawk. Nomination thehluhna leh endikna pindana an luh dawnah hand sanitizer an hmang ngei tur a ni a, ṭhutna pawh ft. 6-a inhlata siam tur a ni. Ṭum khatah mi panga aia tam an lut tur a ni lo. Hengte hi returning officer-in an kengkawh tur a ni.

Polling Station: Polling station leh a chheh­velah engtik lai pawhin physical distancing zawm reng tur a ni a, ṭum khatah mi 50 aia tam punkhawm loh tur. NGO/MPF/security/medical duty-te pawh physical distancing zâwmin an duty tur a ni. Polling station leh a chhehvelah chil chhâk phal a ni lo a, khuh dawn pawhin rawmawl hmanga hmui hup ngei ngei tur a ni a, hmai tuam ngei tur a ni bawk.

Polling Booth: Inthlan ní-ah polling booth-te hi boruak lut leh chhuak ṭha thei turin tukverhte hawn tur a ni a, vote thlak turte intlarna tur ft. 6 danah chhinchhiah tur a ni. Polling booth-ah luh leh chhuahna a hrangin fel taka siam tur a ni a, luhnaah hian entry register chhawp tur a ni a, vote thlak turte'n an hming leh phone number an ziak tur a ni. Hmai tuamna (mask) vuah lote'n vote an thlak thei lo ang. Polling official, candidate leh election/polling agent zawng zawng pawhin mask an vuah reng tur a nih bakah, eng lai pawhin physical distancing an zâwm tur a ni. Vote thlak tur reng rengin polling booth an luh dawnah hand sanitizer an hmang ngei tur a ni.

Vote chhiar: Vote tlate chu physical distancing dan zâwm chungin vote chhiar tura ruatte'n an chhiar tur a ni a, candidate leh an agent-te chu physical distancing zâwm chungin vote chhiarnaah an awm thei ang a, mask vuah ngei tur a ni. Zan dar 8:30 aṭanga zing dar 4:30 thleng curfew a nih avangin election official, candidate leh mawhphurhna bik nei lote chu counting hall leh a chhehvelah zan dar 8:30 hnuah awm phal a ni lo. Inthlan result peih a nih hnuah a ṭul chuan public address system/tlangau hmangin puan a ni ang.

Bru voter: Tun ṭum VC leh LC inthlanpui atan hian dan angin Tripura-a Mizoram Bru-te chu electoral roll-ah telh an ni. Dan­in chanvo a pek angin, electoral roll-a an awmna VC leh LC-ah an ding duh emaw, vote an thlak duh emaw a nih chuan Mizoram sorkara Disaster Management & Rehabilitation department-in July 31, 2020-a order a chhuaha inkaihhruainate zâwmin, inthlannaah an chuh thei a, vote an thlak thei bawk.

Hremna: Thupek zâwm lo chu Disaster Management & Rehabilitation Act, 2005 Section 51-60 te, The Mizoram (Containment & Prevention of COVID-19) Ordinance, 2020 Section 5 leh, IPC Section 188 hmangin hrem theih a ni.