RIMS, Imphal-a Mizo zirlaite'n an awm zel dan tur la hre thei lo

Regional Institute of Medical Sciences (RIMS), Imphal, Manipur-a Mizoram aṭanga zirlai awmte chuan an awm zel dan tur an la hre thei lo.

RIMS-ah hian Mizoram aṭangin post graduate (spe­cialist), MBBS, BDS etc. zirlai mi 140 chuang an awm a, Manipur buaina avangin Mizoram sorkar hmalakna leh mahni sum sengin Mizoramah an rawn haw hlawm a ni. Tun dinhmunah RIMS-a Mizo zirlaite hian Imphal an chhuahsan kim tawh nia thudawn a ni.

Vanglaini palai zawhna chhangin post graduate zirlai pakhat chuan, an hmalam hun tur sawi thiam a har rih thu sawiin, "Tun dinhmunah chuan let leh mai chi a ni lo maithei. State dang aṭanga zirve mekte nen pawh kan la sawiho ang chu," a ti.

Hetihlai hian, RIMS chuan post graduate zirlai an hmun chhuahsante chu mahni duhthua chhuak leh dan bawhchhia anga ngaih an nih thu thuchhuah siamin a tarlang.

MBBS zirlai Vanglaini palaiin a biak pawhte pawhin a him ngeia an hriat hma chuan tumah an kir ngam an rin loh thu an sawi a, "RIMS lamin eng thuchhuah pawh siam se, a him ngeia kan hriat hma chuan kir chi-ah kan ngai lo. State dang zirlaite nen kan inbe râwnin kan ring," a ti.

RIMS chuan MBBS zirlaite hian summer holiday hun an sawn hma. a; summer holiday hi June a neih ṭhin nimah se, Manipur buaina avangin kumin­ah chuan May 10 aṭanga May 20 thleng atan puangin, May 22 aṭanga class ṭan leh turin an ti.

Hetihlai hian, Mizoram sorkar chuan Regional Institute of Medical Sciences-a MBBS zirlaite hi chawlh pe rih turin RIMS thuneitute an ngen sak a, chawlh pek chhung tur erawh tarlan a ni lo.