Zirtirtu dah belh phûtin zirlaiten Champhaiah lungawi lohna an lantir

MZP Hqrs., Champhai hmalak­nain Govt GM Higher Secondary School-a zirtirtu dah belh phûtin May 9, Thawhlehni leh nimin khan lungawi lohna lantir a ni. Sorkar aṭanga thu lawmawm an dawn avangin nimin tlai dar 5 khan lungawi lohna lantir an titawp.

Thawhlehni khan zirlaite chuan Govt. Gandhi Memorial Higher Secondary School, Champhai tual leh a kiang hnaiah Govt. GM HSS-a zirtirtu indaih loh avanga an lungawi lohna lantir nan sit-in demonstration an huaihawt. An hmalakna hian awmzia a neih loh avangin nimin khan Champhai khawpui chhunga sorkar pisa-a kai turte an dang.

Champhaiah hian sorkar sikul leh mimal enkawl sikul zawng zawngte chu khar vek a nih avangin sikul kai tur dan tur an awm lo. Sorkar pisa-a kai tumte chu dan an ni a, pisa kai luih tum an awm lo nia thudawn a ni.

Champhai MZP chuan sorkar aṭanga thu lawmawm an hmuh hma chuan theihtawp chhuahin hma an la chhunzawm zel dawn tih an sawi. Vawiinah pawh zirna-in leh sorkar pisa kai turte hi dan chhunzawm an tum.

Hetihlai hian sorkar aṭanga thu lawmawm an dawn avangin nimin tlai dar 5 khan Champhai MZP chuan lungawi lohna lantir an titawp.

Champhai MZP-te hian Educa­tion Directorate aṭangin Govt GM HSS-ah zirtirtu pathum - SEDP hnuaiah pek belh an nih tur thu ziaka an dawn bakah, Champhai North Bialtu MLA-in zirtirtu pakhat a rawih belhsak dawn avangin lungawi lohna lantir hi an titawp ta a ni.

Champhai NGO Coordination Committee chuan Champhai MZP hmalakna chu lawmawm an tih thu an sawirualin, Govt GM HSS-a zirlaite mamawh zat zirtirtu an awm loh avanga zirna-in leh sorkar pisa khar a ngai ta chu pawi an tih thu an sawi thung.

Champhai NGO chuan zir­lai­te ngenna chu a rang lama ti­hlawh­tling ngei tura sorkar phûtin, "Tun hma aṭanga Champhai hma­sawnna tur chi reng reng nawr leh kar ngai renga a awm bik hi a vanduaithlak," an ti.