A duty puite kaphlumtu thubuaiah Court-ah chargesheet la thehlut lo

March 5, 2023 zan dar 6 pelh hreta Kolasib district-a Saihapui-V bul, Buarchêpa ramri vénga duty police pahnih AK-47 rifle hmanga kah hlum chungchangah court-ah thubuai chhuina (charge­sheet) thehluh a la ni lo.

Police hotute hnen aṭanga Vanglaini thudawn danin, a police pui pahnih kaphlumtu Hav. Bimal Kanti Chakma (56) s/o Sigan Morot Chakma chu Kolasib District Jail-ah a tang mek a, thu zawh fiah ngai angte zawh fiah fel thawkhat a ni tawh.

He thubuai kaih­hnawiha thu zawhfiah ngai dangte pawh zawh­fiah a ni tawh. Hetihlai hian, hetiang thubuai kaihhnawiha mithiam bikte thu leh hla (expert comment) ngaihchan mek a ni a, hei hi hmuh a nih hun chuan chargesheet theh­luh theih thuai a ni ang.

A duty pui Hav. J Lalro­hlua, Lawngtlai Chanmari leh Hav. Indra Kumar Rai, Lungleite kaphlumtu Hav. Bimal Kanti Chakma hi police aṭanga ban a ni tawh a; a lakah Vairengte Police Station-ah thubuai ziah luh a ni.