KHAWTHLIR

Thisen pe

Nimin khan Synod Higher Secondary School NSS unit chuan Synod Hospital tan thisen unit 53 an pe a, petute mipa 37 leh hmeichhia 16 an ni. Synod lay worker mipa 12 leh hmeichhia pangate'n Synod Hospital tan unit 17 an pe bawk.

HSLC Result

Mizoram Board of School Education (MBSE) chuan vawiin chhun dar 12 hian HSLC Examination, 2023 result a tichhuak dawn a; MBSE Office, Chaltlangah leh www.mbse.edu.in emaw www.mbseonline.com ah en theih a ni ang. Result bu hi lei theiha siam a ni a, office hun chhungin whatsapp leh phone call hmangin 9863883041/ 9863722521-ah result hi ngaihven theih a ni dawn bawk.

Kawng khar dawn

NH-306A, Phainuam leh Saiphai inkara Kelkul lui bailey bridge chu naktuk aṭanga May 16, 2023 thleng siam ṭhat hna thawh a nih dawn avangin helai kawngah hian hnathawh chhungin lirthei tlan phal a ni dawn lo a, Bilkhawthlir leh Bagha kaltlanga hêl theih a ni.

Civil Hospital, Aizawl thawmṭhat sawiho

Chief minister Zoramthanga hoin nimin khan CM Conference Hall-ah Health department hotute an ṭhukhawm a, Civil Hospital, Aizawl thawmṭhat kawnga hmalak dan tura PWD leh Geoglogy & Mining mithiamte'n Civil Hospital, Aizawla block ṭhenkhat, a sakna rei tawhte an enfiahna report an ngaithla a; siamṭhat emaw a remchan dan anga sakṭhat a ṭul dan leh hemi atana ruahmanna hrang hrang siam dan turte an sawiho.

E-forensic training

Mizorama Sub Divisional Police Officer (SDPO) te, Police Station OC te, Excise & Narcotics department hnuaia Asst Commissioner leh Officer in-charge te, Anti-Corruption Bureau hnuaia Case Forwarding Authority-te tan nimin khan Directorate of Forensic Science Laboratory-a expert-te'n 'e-forensic online training' an buatsaih.