Lirnghing zir chianna sawiho

Minister of state Lalchhandama Ralte chuan nimin khan a pisaah Mizoram khaw­chhak lama lìrnghîng ṭhin zir chiangtu mi­thiamte a kâwm a, lirnghing an zir chiannate a sawipui.

Lalchhandama Ralte hian lirnghing tuartu Tuipuiràla khaw hrang hrangte chu tun hnai khan a tlawh kual a, harsatna an tawh dante a en. Chumi hnuah mithiamte chu a hmun ngeiah an hmanraw neih ang ang nena kala zir chiang turin a sáwm a, mithiamte chuan an zir chiang ta a ni.

Khawchhak lama chengte tawrh­na chu Mizoram mipui leh sorkarin a tawrh­pui a, an lam a hawi reng tih sawiin Lalchhandama chuan, "Leilung lam zir mithiamte an pên chhuak ṭhin hi Tuipuiràla chengte'n an thlamuanpui hle a, mithiamte hi kan chhuang hle a ni," a ti.

East Tuipui bialtu MLA Ramthanmawia pawhin thu sawiin, "Lir­nghingin Tuipuiral a chhu nawn sek mai hian mipui a tibuai nasa a, mithiamte a hmunah an tlan nghal erawh a thlamuanthlak," a ti a, mipui mamawh an sawi apiang sorkarin a ngaihtuah nghal zel thu a sawi.

Geologist-te chuan, lirnghing awm fo chuan radon gas a tichhuak ṭhin a, radon gas a tam chuan ei leh in a tibawlh­hlawh a, hriselna a tikhawlo nghal theih avangin, gas level chu teh vat ṭul an tih thu an sawi.

Leilung chhungril awm dan data chu Champhai aṭangin Keiṭum thlengin an la tih sawiin geologist-te chuan, "US Geological Survey-ah kan thawn a, leilung khîk dan leh inthleh dante a hriat theih dawn a ni," an ti a; lei khi chat lian tham thleng mai thei anga mi ṭhenkhatin an hlauhthawn chu thil thleng mai theiah an ngai lo.

Lalchhandama Ralte ngenna anga khaw chhak tlangdunga lirnghing ṭhin zir chiangtute chu Mizoram University, MIRSAC, Zirtiri Residential Science College leh Lunglei College-a mithiamte an ni a; Zofa Consultancy Services-in in chhia siamṭhat leh dan tur an en bawk.