Larsapin sorkar hotute leh bank manager-te mipui hamṭhatna dah hmasa zel turin a chah
Governor Dr Hari Babu Kambhampati chuan nimin khan Lunglei a tlawh a, DC conference hall-ah sorkar hotu te, bank manager-te, kohhran, NGO leh VC hruaitute, PMMY beneficiary-te, LMC councillor-te leh political party hruaitute nen an inkawm.
Larsap chuan sorkar hotute leh bank manager-te chu district tihmasawn tura mawhphurhna fawng vuantute an nih angin an hma zawn ṭheuha tih tur awmte uluk leh taima taka thawk a, mipui hamṭhatna dah hmasa zel turin a chah.
Inkawmhonaah hian sorkar hotute chuan an department hmalakna leh harsatna an neihte Larsap hnenah hian an thlen a; Larsap chuan sorkar hotute leh bank manager-te chu district tihmasawn tura mawhphurhna fawng vuantute an nih angin an hma zawn ṭheuha tih tur awmte uluk leh taima taka thawk a, mipui hamṭhatna dah hmasa zel turin a chah a ni.
Dr Hari Babu Kambhampati chuan, sorkarin mipuite tana scheme ṭha tak tak a siamte a nih dan tur ang ngeia ṭangkai taka hman an nih theih nan department-te chuan mipui pan hmasak nghak loa a ṭul apianga pen chhuaka mipui an zirtir nasat a ṭul thu a sawi a, "Mizoram hmun hrang hranga district mipui tam zawkten sorkar laipui welfare scheme ṭha tak takte an hre lo hle tih ka hmu a, pawi ka takzet," a ti.
District tihmasawn zel turin bank-te'n mawhphurhna pawimawh tak an neih thu sawiin Larsap chuan, "Sorkar laipui scheme hrang hrang- Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Atal pension Yojana (APY), Pradhan Mantri MUDRA Yojana (PMMY) leh a dangte pawh mipui tam zawkin an hman ṭangkai theih nan theihtawp chhuah ang che u," a ti a, heng scheme hnuaia Lunglei district bank-te hmalak dan amah ngeiin a vil chhunzawm zel tur thu a sawi.
Larsap chuan Lunglei district-a Jawahar Navodaya Vidyalaya (JNV), Eklavya Model Residential Schools (EMRS) leh Kendriya Vidyalaya-ah te zirlai an tlem chu pawi a tih thu te, thingtlang khua aṭanga zirlai tam zawk an luh theih nan awareness campaign neih a ṭul thu te, Lunglei district-a inbiakpawhna leh internet connectivity ṭha zawk a awm theih nan 4G saturation project leh BharatNet Project kalpui mekahte chak taka hma lak chhunzawm zel a ṭul thu a sawi.
Harsatna an neih chuan a hnenah thlen hreh lo tur te, ṭhalai lehkhathiam hna hmu lote tan theihtawpa hmalak a ṭul thu te, DDU-GKY Scheme, Polytechnic leh ITI-te pawhin training pek mai piah lamah, an eizawnna ngaihven puia placement-te buatsaih sak tura a duh thute a sawi bawk.
Lunglei District Dinhmun (Ṭhutkhawma tarlante)
* Lunglei district hi sq.km 4056.58 a zau a ni a, mihring 1,35,315 vel an cheng mek.
* VC 113, Civil Sub Division pahnih, RD Block pali, Assembly Constituency paruk a awm.
* Pradhan Mantri Mudra Yojana hnuaiah 2022-23 chhungin mi 588 hnenah loan cheng nuai 1849.24 pek a ni.
* National Social Assistance Program-ah beneficiary 5,630 an awm.
* Pradhan Mantri Gram Sadak Yojana hnuaiah kawng 14 siam zawh tawh niin, 24 thawh mek a ni.
* 15th Finance Commission Rural Body Grant hnuaiah kum 2022-23 chhungin cheng nuai 1652.55 hu hna thawh a ni.
* JJM hnuaiah chhungkaw 14,890 hnenah Functional Household Tap Connection pek a ni.
* Lunglei DEF hnuaiah Police Station pali leh 2nd Bn MAP an awm
* January 1 - May 10, 2023 chhungin thubuai 97 ziahluh a ni a, chargesheet 36 thehluh tawh a ni.
* In rawk leh thil inruk sak thubuai tam berin, kuminah 62 a awm tawh.