Infiammi tiṭhate lawmpuina hlan

Mizoram State Sports Council (MSSC) hnuaia Non-Residential Coaching Programme (NRCP) 2022-2023, ‘1st Annual Felicitation of High Achievers’ chu May 9, Thawhlehni khan Dawrpui Multipurpose Centre-ah neih a ni a, Sports & Youth Services minister Robert Romawia Royte, MSSC president ni bawkin a hmanpui a; NRC Programme for Athletics and Judo a hawng nghal.

MSSC Non-Residential Coaching Programme 2022-2023 hi July 13, 2022-ah hawn a ni a, a bulṭan nan discipline paruk - basketball, boxing, table tennis, tennis, weightlifting leh wrestling-ahte coaching programme kalpui a ni. Kum 2022-2023 chhung khan MSSC chuan NRCP kaltlangin national level-ah medal pathum, regional level-ah medal 12 leh state level-ah medal 42 an la a, a vaiin medal 57 an la a ni.

Robert Romawia Royte chuan, NRCP-a tiṭhate lawmpuina hun hman a ni chu lawmawm a tih thu a sawi a, "Nakkum aṭang chuan NRCP-ah hian athletics leh judo pawh telh a ni tawh dawn a, infiammite a bika enkawl nan Mizoramah Khelo India hnuaiah state centre of excellence for boxing, wrestling leh weightlifting tan kan nei," a ti a, hengte hi NRCP nen thlunzawma thawhho ṭha a tih thu a sawi

Infiam zirna sikul (sports school) neih a chakawm tih sawiin Sports Minister chuan, "Chumi atan chuan sorkarin theihtawpin hma a la mek a, a hlawhtlin hunah chuan infiammite tan mellung pawimawh tak a ni dawn. Ṭhalai zu ngawlvei leh ruihhlo ti tam lutuk hi a runthlak a, infiamna hmanga chhanchhuah an nih theih ka beisei," a ti.

Romawia chuan, mimal, chhungkua leh khawtlang an ṭanho chuan infiamna hmangin ram a siamṭhat theih niin a sawi a, "Infiamna chawinun zel nan leh ṭhalaite chochhuak a, phurna petu atan jump rope show bikah National Level Competition Mizoramin a thlen ngei theih nan hmalak tum a ni," a ti bawk.

He hunah hian Youth Affairs & Sports Development Board vice chairman TC Pachhunga pawhin thu a sawi a; NRC programme documentary tawi thlirho a ni.