CADC inthlanah vote 94.05% a tla

State Election Commission (SEC)-in Chakma Autonomous District Council (CADC) inthlan­puia vote tlak dan (final voter turnout) a tarlan danin, MDC bial 19-a voter 34,474 zinga 32,424 (94.05%) in vote an thlak. Vote tlate hi vawiin zing dar 8 aṭangin Chawngte SDO (Civil) Office Complex-a counting hall pahnihah chhiar a ni ang.

Member of District Council (MDC) bial 19-ah hian polling station 67 a awm a, May 9, Thawhlehni zing dar 7 aṭanga tlai dar 5 thleng vote thlak hun hawn niin, hemi hun chhunga vote thlak zawh hman lohna polling station ṭhenkhatah chuan polling area-a lut hman chin tan hun hi pawhsei a ni. Polling station zawng zawngah hian tluang takin vote thlak zawhfel a ni.

Polling station 67-ah hian vote thlak nan Electoral Voting Machine (EVM) hman a ni a, voter 34,474 (mipa 17,455 leh hmeichhia 17,019) zingah mi 32,321 (mipa 16,462 leh hmeichhia 15,859) in vote an thlak a, vote thlak percentage hi 93.75% a ni.

Election duty avanga mahni vote neihna hmuna vote thlak thei lo turte hnen aṭangin postal ballot hmanga vote thlak dilna 108 a awm a, heng zinga 103 hian postal ballot hmangin vote an thlak a ni.

EVM-a vote tla leh postal ballot-a vote tla hi a vaiin 32,424 a ni a, hei hi vote awm zawng zawng 34,474 aṭangin 94.05% a tling.

CADC inthlanpuiah hian MDC bial 19 zingah voter 1,526 awmna Mondirasora bialah vote a tla ṭha ber a, voter 1,526 zinga 1,488 (97.51%) in vote an thlak. Voter 3,531 awmna Kamalanagar 'N' bialah mi 3,096 in vote an thlak a, vote tla percentage hi 87.68% niin, vote tlak chhiatna ber bial a ni.

Polling station 67 zingah 3/4-Nakdarasora PS-ah vote tla ṭha berin vote awm zawng zawng 261 aṭangin vote 260 (99.62%) a tla a; 7/2-Saizawh West Polling Station-ah vote awm zawng zawng 343 aṭangin vote 289 (84.26%) a tla a, vote tlak chhiatna ber PS a ni thung.