Synod Hospital hnenah coffee herna khawl hlan

Land Resources, Soil and Water Conservation (LRSWC) minister R Lalzirliana chuan May 9, Thawhlehni khan Synod Hospital, Durtlang hnenah coffee peeling leh grinding machine a hlan.

R Lalzirliana chuan, Synod Hospital, Durtlangin coffee chìn nachang an hria chu fakawm a tih thu a sawi a, "Tunlaiah global warming-in nghawng lian tak a nei a, Mizoram pawh a nghawng nasat ber turte zing ami a ni. Chuvang chuan ngaw daihlima coffee lo chìnte hi a hlawk thlak hle a, a bik takin Durtlang Hospital-a hnathawktute tan phei chuan an hunawl neih tlemte an hman ṭangkai theihna leh rilru chhâwk zangkhaina tur ṭha tak a nih ka besei," a ti.

Synod Hospital chu thlei bik nei lo damdawi-in a nih avangin tumah admit duh loh an nei lo tih sawiin Minister chuan, an rawngbawlna a ropuiin fak tlak a nih thu a sawi bawk.

Synod moderator Rev. Dr C Chawnghmingliana pawhin thusawiin, LRSWC department-in coffee enkawlnaah kaihhruaina an pe thei tur chu a lawm thu a sawi a, "Synod Hospital hi huapzo a ni a, a châng chuan damlo ṭhenkhatin bill an pek theih loh tling khawm avangin hospital intodelh lo anga hriat ni ṭhin mah se, hospital rawngbawlna hi chak zawka kalpuia, mite tan malsawmna nih chhoh zel kan tum a ni," a ti.

Coffee herna khawl hi TGI Coffee Grinder leh Farm type Baby hand pulper a ni a, a kâwr khehna hian darkar khatah kg 100 vel a kheh thei a, grinder hian darkar khatah kg. 8-12 vel a her thei.