Zirlai nu leh paten lawmthu an sawi
Imphal-a Mizo zirlai nu leh pate chuan thuchhuah siamin, an tu leh fate, Imphal-a awmte mangang leh thlabar taka silaimu karah mittui nen an awm mek laia Mizoram sorkar hotuten heng zirlai tangkhangte thlamuanna tura venhimna chungchangah leh Mizoramah a rang lama hruai haw an nih ngei theihna tura hma an laknaah an lawm thu an tarlang.
Buaina chhuah ṭan tirh aṭangin chief minister Zoramthanga'n him taka zirlaite hruai chhuah an nih ngei theihna atan theihtawp a chhuah tih tarlangin zirlai nu leh pate chuan, "Home department-a thawktute leh an lo haw kawnga Mizoram House, Kolkata leh Guwahati-a thawktuten duat tak leh duhsak taka an lo dawnsawnna zawng zawngah te, sorkarin an rawn hawna man, thlawhna, bus/sumo, an riahna leh ei leh in a thlawn vek avangtein kan lawm tak meuh meuh," an ti.
Zirlai nu leh pate chuan May 9, 2023 zanah Imphal-a Mizo zirlaite chuan Pathian zarah him dam takin Manipur an chhuahsan fel taah an ngaih thu tarlangin, "Tun ṭum Manipur buai avang hian Imphal-a zirlai nu leh pa/chhungte a remchan angin kan intelkhawm a, kan harsatnate inhriatsak tawnin, sorkar hmalaknate pawh eng emaw chen kan hria," an ti a, thinlung taka sorkar chunga an lawmthu an tarlang.