Sorkar leh MP-te hmalak dan MNF party-in chhuanawm an ti

MNF party chuan thuchhuah siamin, Manipur-a buaina avanga Zofate tawrhna thleng mekah Mizoram sorkar hmalakna leh Mizoram MP pahnih C Lalrosanga leh K Vanlalvena te hmalakna chhuanawm an tih thu an tarlang.

MNF chuan Mizoram sorkar leh MP pahnihte'n a ṭul anga theihtawp an chhuah thu tarlangin, "Zofate himna tur leh Kristian sakhaw himna atana an beihna hi a ropuiin a chhinchhiah tlak kan ti hle. Kan MP-te pahnih hian central sorkar thuneitute hnenah rang taka zualkoin, theihtawp chhuahin hma an la a ni," an ti.

Central minister-te hnenah ṭawngka leh lehkhain Zofate harsatna leh buaina chinfel a nih theihna turin MP-ten thu an thlen nghal thu tarlangin MNF chuan, "North East MP-te leh MP dangte be kualin, theihtawp chhuaha hma an la hian awmzia a neiin a hlawk em em a ni," an ti a; buaina avanga zirlai, hnathawk leh tangkhangte hruai­chhuah an nih theihna atana MP-te hmalakna chhuanawm an tih thu an tarlang.

MNF chuan MP pahnihten Mizoram chhung leh pawna Zofate thlavang hauha theihtawp chhuaha hma an lak mekna hi mipuiin an thlawp tlat nia tarlangin, "Kan theihna zawna kan thawhpui zel hi MNF chuan ṭul a tiin, mipui a ngen bawk a ni," an ti.

K Vanlalvena'n Manipur buaina chinfel a nih theihna tur leh he buaina avanga pawisawi lote tawrhna leh thihna chungchang chhui chiang tura Kristian MP-te telna, Joint Parliament Team din Prime Minister hnena rawtna a thlen chu tihhlawhtlin a nih ngei an beisei tlat tih MNF chuan an tarlang bawk.