PZP-in kawng siamtu contractor an dem

Páng Zirlai Pawl (PZP) General Headquarters, Vaṭhuampui chuan thuchhuah siam­in, Saibawh-Vaṭhuampui kawng siam chungchanga Vaṭhuampui JAC hmalakna chu an thlàwp thu an tarlang a; ṭha lo taka kawng siamtu contractor an dem rualin, chak zawka hna thawk turin an ngen.

PZP tarlan danin, Saibawh-Vaṭhuampui kawng siam­a contractor chu Lalthan­thuami, Chawnpui, Aizawl a ni a, a hnuai­ah sub-contractor Hmangaihsanga, Lawng­tlai Vengpui-in a thawk a ni. Kawng siam hna chu PMGSY aṭanga thawh niin, sum rua­hman chu Rs. 20,88,74,403.54 a ni a, thawh ṭan hun (date of commencement) chu June 14, 2020 a ni.

Kawng siam mek chu Pa­neled Concrete Pavement (PCP)-a siam a ni a, contractor-in a nih tur angin an siam lo nia an hriat vangin Vaṭhuampui JAC hmalaknain khawtlang mipuiin August 3, 2020 khan an lo tichhe tawh a ni. JAC hmalakna chu an thlàwp thu, PZP chuan an tarlang.

PZP chuan, SaibawhVaṭhuampui kawng siam mek chu a hmunah kal chilhin, ṭha taka siam turin hna thawktute an lo ngen tawh ṭhin tih sawiin, "Chutih laia cement, balu leh rora hmang lo a, GSB (ṭiau) leh cement ringawt chawhpawlha siam a ni a, nihliapa chhun khawh mai mai theih tura hna thawh a nih hi ná kan ti a, Mizoram sorkar leh PWD tihmualphona leh mipui zahlohnaah kan ngai," an ti.