Minister-in ramria duty-te tlawh

Tuivawl bialtu MLA Lalchhandama Ralte, minister of state chuan nimin khan a bial chhunga ramri duty-na hmun - New Vervek Tuivai kai, Khawpuar leh Vaitin inkar Zilthawhchhuah te a tlawh a, ei leh in tur bakah duty-te damdawi, silpauline leh pawisate a hlan.

Lalchhandama Ralte chuan Covid-19 dona kawnga Mizoram sorkar hmalakna chu duhthusam ni thei lo mah se ram himna atan sorkarin theihtawp a chhuah tih sawiin, "Mipuiin sorkar harsatna kan hriatthiampui a ngai a, kohhran, NGO leh sorkar ṭangrual zel a pawimawh. Covid-19 leng chuan ram leh khawtlang nunah inhmangaihna leh induhsak tawnna thlen zel se a duhawm hle," a ti.

Sorkar thuchhuah tarlan danin, Manipur leh Mizoram inrina, Tuivai kam New Vervek kaiah hian thla khat chuang zet chu tlawmngaite zan riakin an duty tawh a, hmun hnih­ah duty-na hmun siamin hmun khatah an riak a; an duty-na bul, lui kamah Manipur aṭanga lo lutte quarantine-na hmun tur an buatsaih bawk. Tun din­hmunah New Vervek bakah Lungsum leh Damdiai aṭangin mi tlawm­ngai­te'n an duty pui a ni.

Manipur nena inrinaa duty-na hmun dang Vaitin khua leh Khawpuar inkar Tuiruang lui kamah Sakawrdai YMA branch pathum - Hmar Veng, Vengpui leh Chhimvengte chu zan riakin kar khat dan zelah a in­chhawk ṭhin.