CADC inthlanah MNF-in seat an la hnem ber; Party mala sorkar siam thei an awm rih lo

May 9, 2023-a Chakma Autono­mous District Council (CADC) inthlana vote tlate chu nimin khan chhiar a ni a, seat 10 latu MNF-in seat an la hnem ber. Hetihlai hian, party malin sorkarna an siam thei lo.

CADC-ah hian MND bial 20 awmin, Rengkhasya bialah chuan BJP candidate thah a nih avangin May 9 hian inthlan buatsaih a ni ve loa, May 17 hian inthlan buatsaih a ni ang. CADC-a sorkarna siam turin seat 11 lak a ngai a, seat 10 latu MNF-te hian Rengkhasya bialah hian hnehna an chan chuan sorkarna an siam thei dawn a, an chak lo a nih chuan party mala sorkarna siam thei an awm dawn lo.

Bial 19 inthlanah hian MNF-in seat 10 an lak bakah BJP-in seat 5 leh Congress Party-in seat 4 an la a, bial 13 chuhtu ZPM chuan seat an la ve lo.

CADC inthlanah hian inhnehna sanna ber chu Ajasora bialah niin, BJP ticket-a thlan tlin Santosh Chakma chuan amah hnaih bertu MNF candidate Subaranta Chakma chu vote 591-in a hneh.

Vote inthlauhna hniam ber chu Chhotapansury bialah niin, INC candidate Supreme Raj Chakma chuan amah hnaih bertu ZPM candidate Shanti Jiban Chakma chu vote 19-in a hneh. CADC inthlanah hian MDC nilai 16 chu an dinna bial ngaiah ṭheuh ding nawn lehin, mi pasarih chu thlantlin nawn an ni.