Minister-in zirlai pass-te a lawmpui

School Education minister Lalchhandama Ralte chuan HSLC Exa­mination 2023 result chung­changah thu­chhuah a siam a; zirlai pass-te a lawmpui thu leh fail-te chu hlawhtlinna la chang ve ngei turin duhsakna a hlan.

Lalchhandama chuan, MBSE-in tluang taka HSLC 2023 result a tichhuak leh ta chu lawm­awm a tih thu a sawi a, "Result ṭha tak leh felfai taka chhuah a nih theih nana rim taka thawktu zawng zawngte chungah thinlung takin lawm­thu ka sawi a ni. Zirlai hlawhtlinna hmu thar zawng zawngte ka lawmpui em em a, an hma lam hun kal zel turah duhsakna ka hlan a ni," a ti.

Education Minister chuan zirlai hlawhtlinna changte chu sang tak thlenga kal zel tur leh an thiamnate ram leh hnam tan pei pung zel turin a chah a, "Tin, tuna hlawh­tlinna chang ve ta lote pawh beidawng mai lo turin ka chah duh a, tun aia ṭha zawka bei turin an rilru siam sauh sauh rawh se," a ti a, hlawhtlinna la chang ve ngei turin duhsakna a hlan.

Naupangten zirna ṭha an hmuh theih nan thâ thlah loa ṭhahnem ngai taka thawk zel turin zirna kaihhnawiha thawkte Minister chuan a chah a, "Kan sorkar pawh hian theihtawp chhuahin hma kan la chhunzawm zel dawn a ni tih ka'n sawi thar leh duh bawk a ni e," a ti.