HSLC 2023-ah zirlai 12,878 an pass Science subject-a fail an tam ber

12th May, 2023

Mizoram Board of School Education (MBSE) chuan nimin chhun dar 12 khan High School Leaving Certificate (HSLC) Examination 2023 result a tichhuak a, zirlai exam 18,102 zinga 12,878 an pass a, pass percentage 71.14% niin, nikum aiin 0.5% in a sang. Subject malah science-a fail an tam ber.

HSLC 2023-ah hian a pumpuiah St. Paul’s Higher Secondary School zirlai Cynthia Lalhlupuii Shangpliang d/o Kyrshanbor Shangpliang chu pakhatna a ni a; top 10-ah mi 17 awmin mipa pathum leh hmeichhia 14 an ni a, an zinga pathum hi hnam dang an ni. Zirlai exam zingah mipa aiin hmeichhia 1,184 in an tam a, pass zingah pawh mipa aiin hmeichhia 710 in an tam zawk.

Kumin HSLC Examination-ah hian exam hmachhawntu zirlai 18,102 zinga 17,778 chu regular student niin, 324 chu private-a exam an ni a; regular-a exam zingah 12,768 (71.82%) pass in, private candidate 324 zinga 110 (33.95%) an pass.

Zirlai pass zawng zawng 12,878-te chu hmeichhia 6,794 leh mipa 6,084 an ni a, pass percentage-ah hmeichhia (70.40%) aiin mipa (71.99%) a sang zawk.

First division-ah zirlai 3,488 pass-in nikumah 3,716 an ni a, second division-ah 4,731 pass-in nikumah 4,309 an pass. Third division-ah zirlai 3,357 pass-in nikumah 2,842 an pass bawk. Compartmental chance nei zirlai 62 an awm.

Kumin hian zirlai 5,162 fail-in, nikumah 4,928 leh kum 2021 khan 2,856 an fail a; kumina zirlai fail zingah hian science subject-a fail 4,449 awmin an tam ber a, Mizo/language subject-ah fail 751 awmin, subject mala fail tlemna ber a ni thung.

Kumin HSLC exam-ah hian sikul 697 aṭangin zirlaite an exam-a, zirlai exam zawng zawng pass vekna sikul 107 a awm a, pass awm miah lohna sikul 14 a awm. Candidate-te pass vekna sikul hi nikumah 98, kum 2021-ah 175, kum 2020-ah 65, kum 2019-ah 72 leh kum 2018-ah 105 an awm a; zirlai fail vekna sikul nikumah 15, kum 2021-ah pasarih, kum 2020-ah 16, kum 2019-ah 24 leh kum 2018-ah 15 a awm.

Tun hnaia HSLC Examination-a pass percentage zat chu - kuminah 71.14%, nikumah 70.64%, kum 2021-ah 82.43%, kum 2020-ah 68.33%, kum 2019-ah 67.93%, kum 2018-ah 76.65%, kum 2017-ah 72.17%, kum 2016-ah 71.17%, kum 2015-ah 68.30%, kum 2014-ah 67.51%, kum 2013-ah 58.63%, kum 2012-ah 72.27% a ni.