Thlipui leh ruahpui lo thleng thei lakah DMR dept.-in fimkhur turin mipui a ngen

Disaster Management & Rehabilitation (DMR) department chuan thu­chhuah siamin, thlipui leh ruahpui lo thleng thei laka fimkhur turin mipuite an ngen.

DMR dept chuan, India Meteorological department, Regional Meteorological Centre, Guwahati-in hriat­tirna a tih chhuah danin, May 13 leh 14-ahte hian Mizoramah ruah nasa tak sur tura hmuh lâwk a nih thu tarlangin, "May 14-ah hian thlipui na tak rawn thawk thut thei a ni. Thli leh ruahpui-in chhiatna a thlen theih laka kan him theih nan mi tinte fimkhur turin kan in ngen," an ti.

DMR-in mipuite zawm tura an duhte

1. Mahni in leh a velah thliin a tih chhiat mai theihte lo thawm ṭhat vek tur a ni. Kawngka leh tukverh zawng zawng nghet taka kalh theih tura siam vek tur a ni a, in chung leh bangte, ran-in/ek-in chung leh bangte kilh ṭhat / ṭawnm ṭhat vek tur a ni. Pawnah leh inchungah thliin a chhèm sawn theihin engmah dah loh tur a ni a, ṭha taka delh beh emaw, ṭawn beh/ kilh beh vek tur.

2. Kan in bul velah thlipuiin a chhem tliah mai theih thing kung leh thing zar a awm em tih enfiah vek tur a ni a, chutiang a awm a nih chuan a theih anga lo thenfai lâwk vek tur a ni.

3.4 Thlipui a lo tleh a nih pawhin chiai mai loh tur a ni a, thli tleh zawh hma chuan pawnah chhuah miah loh tur a ni. Chhiatna a thleng a nih chuan min bialtu sorkar thuneitute hrilh vat tur a ni.

4. Ram lama hna thawk mi tan kan awmna bûk/thlâm thawm ṭhat vek tur a ni. Thli tleh laiin thingkung hnaihah awm miah loh tur.