Manipur buaina avanga Mizoram mi sorkarin a lak chhuah dan thlirho

Home minister Lal­cham­liana hoin nimin khan sorkar hotu pawi­mawhten Mani­pur buaina avanga Mizoram mi leh sa Imphal leh a chhehvela tang­khangte Mizoram sorkarin a lak chhuah dan Secretariat conference hall-ah an thlirho.

Home Minister Lalchamliana chuan, Manipur buaina avanga Mizoram mi leh sa tang­khang hriat theih chin chu lak chhuah vek an nih tawh thu sawiin, hemi atana hmalatu Chief Minister, Chief Secretary, DGP, Home deptt. official-te leh department hrang hrang a mi theihtawp chhuahtu zawng zawngte, YMA, tlawmngai pawl zawng zawngte leh zirlai pawlte chungah lawmthu a sawi.

Home secretary H Lalengmawia tarlan danin, Manipur buaina chhuah tirh May 3, 2023 aṭanga May 7 leh 8, 2023 khan belhkhawmin mi 168 lak chhuah an ni. May 9 khan mi 88 leh May 10 (nimin) khan mi 6 lak chhuah leh an ni bawk.

Imphal aṭanga hruai chhuah zawng zawng hi mi 262 an ni.

Meeting-ah hian Arunachal Pradesh-in Mizoram sorkar puihna a rawn ngen angin an state mi leh sa zirlai naupang pali Churachandpur-a tangkhangte Mizoram kaltlangin lak chhuak sak an nih thu tarlan a ni.

Supply department lamin raltlante tan hian buhfai quintal 800 chuang an pe chhuak tawh tih tarlangin, district tina thuneitute pawhin ruahmanna mumal tak neiin hma an lak mek thu an tarlang bawk.