KHAWTHLIR
Nurses Day hmang dawn
Vawiin, May 12 hi International Nurses Day a ni a, khawvel pumah hman a ni dawn a, Mizoramah pawh hmun hrang hrangah hman a ni ang. Kumina Nurses Day thupui chu 'Our Nurses, Our Future' tih a ni. International Nurses Day hi Civil Hospital, Aizawl chuan Dawrpui Multipurpose Hall-ah an hmang dawn a ni.
ICCU hawng
May 10, Nilaini tlai khan Ebenezer Medical Center-ah Cardiac Cath Lab leh Intensive Coronary Care Unit (ICCU) hawn a ni. Cardiac Cath Lab hi lung enkawlna khawl a ni a, pacemaker vuah te, heart attack siamtu lunga thisen zam block tih kuakna te, lungphu buai siamṭhat leh thil chi hrang hrang enkawlna hmanrua tur a ni. Lung enkawlna bakah hian stroke leh thluaka thisen zam dik lo enkawlna atante pawha la hman theih tur a ni. ICCU hi lung ṭha lo bikte dahna tur a ni a, khum pariat a awm.
Thisen pe
Bilkhawthlir Kualmawi Ṭhalai Pawl chuan nimin khan YMA hall-ah Kolasib District Hospital tan thisen unit 37 an pe a, petute mipa 31 leh hmeichhia paruk an ni.
Minister-in hmanpui
Kanan Branch YMA chuan an kum 50 (golden jubilee) tlin puala an veng chhunga hmeithai pakhat in an sak chu nimin zing khan a hlanna hun hman a ni a, bialtu MLA Lalruatkima, minister-in a hmanpui. Lalruatkima hian in sakna atan hian a mimal sum Rs 2,00,000; a bang tur tile leh a chung rangva tur bandel li a thawh a, YMA leh Kanan Mistiri Association-ten a sak hna an thawk.
Heroin man
CID (Special Branch) te chuan an thudawn bawhzuiin May 10, Nilaini zan khan Zemabawk thlanmualah Lalhruaizela (37) s/o K Bahadur, Zemabawk Hmangaihna Veng nia inchhal kut aṭangin heroin gram 581 an man. CID-ten heroin an man hi international market-ah chuan cheng nuai 290 man hu a ni.
Kuhva rah man
Sairang Police check gate-a duty-te chuan Laldingngheta (43), Armed Veng South, Aizawl nia inchhal khalh truck (407) aṭangin May 10, Nilaini zingah Myanmar kuhva rah nia hriat ip 41 an man. Kuhva rah hi Custom Preventive Force, Aizawl-ah dan anga hmalak zui turin an hlan.
Museum Exhibition
Art & Culture department chuan nimin khan Hnahthial district pualin Hnahthial GSA Hall-ah 'Museum & Record Exhibition Cum Book Sale' a buatsaih a, additional DC Lalvenhima'n a hmanpui. He hunah hian Tribal Research Institute leh Mizo Publication Board te'n lehkhabu hrang hrang an pho chhuak a; Mizoram State Museum leh Mizoram State Archives-ten museum-a thil hlui hrang hrang leh lehkha pawimawhte an pho chhuak bawk.
Ton 10 aia rit zawh khap
Aizawl- Reiek-West Lungdar kawnga Tlawng lei (suspension girder bridge) chu kum 30-a upa a nih tawh avangin Aizawl DC chuan lirthei ton 10 aia rit tan zawh khap a nih thu a tarlang a; "Lei thar dawh mek a ni a, lei dawh hnathawkte him nan leh hnathawh tibuai zawnga awm lo turin mipuite kan inhriattir a ni," a ti.
Mission Zotuithiang
Aizawl District Water and Sanitation Committee chu an chairman Dr Lalhriatzuali Ralte, Aizawl DC hoin a pisaah nimin khan an ṭhukhawm a, Aizawl district chhunga khaw hrang hrang leh Aizawl khawpui chhunga faina leh tuihna humhalh kawnga hmasawn dan tur an sawiho a, Water and Sanitation Mission chak leh zuala kalpui a nih theih nan Mission Zotuithiang neih an rel.