HSLC-ah appilication leh HOTS question vangin distinction-a pass an tlem - MBSE Chairman

Mizoram Board of School Education (MBSE) chairman JH Zoremthanga chuan nimin khan HSLC Examination 2023 result tihchhuah chungchangah thuthar thehdarhtute a kawm a; kumina HSLC exam-ah hian a thiam bikte tana exam question her danglam - appilication leh higher order thinking skills (HOTS) question 40% an dah avangin distinction-a pass an tlem phah thu a sawi.

JH Zoremthanga chuan, kumina HSLC exam zawhnate hi a awlsam chi - lower order thinking skills (LOTS) aṭangin 60% leh a thiam bikte tana an thiamna pho chhuahna tura zawhna her danglam bik Application leh HOTS aṭangin 40% siam a nih thu a sawi a, "Application leh HOTS hi zirlai nawlpuiin an thiam loh, tlema zawhna herdang lam deuh a nih avangin kuminah distinction-a pass hi an tlahniam deuh a, hei hi kan zirnain hma a sawn zelna tur a ni," a ti.

MBSE Chairman sawi danin, HSSLC-ah pawh COEP a awm tawh dawn a, state dangte nena inel tur an nih tawh avangin zawhna siam dante pawh a dang­lam chho deuh hlek dawn.

Mizoram sorkar leh Education Minister-in zirna an ngaih pawi­mawh avangin state dangte leh Mizoram aia exam ṭan hmasa zawk CBSE leh ICSE-te aiin result an tichhuak hma chu an lawmthu sawiin MBSE Chairman chuan, "Tluang taka exam kan zo thei leh ruahman lawk anga result kan chhuah theihna chhan bulpui ber chu zirtirtute inpekna leh ṭhahnemngaihna vang a ni a, question set, evaluation, scrutiny, tabulation-ah te an tih tur ṭha taka an hlen vang a ni," a ti a, School Education department hnuaia thawkte an ṭanrualna a ṭhat thu a sawi.

MBSE chuan HSLC pass zawng zawngte an lawmpui thu leh a hlawhtling ve lote pawh beidawng mai loa exam leh huna pass ngei tawh tura ṭhahnem ngai taka zir turin an ngen.

MBSE Chairman tarlante

▶ Kuminah hian sikul 697 aṭangin zirlai 18,708 zinga 18,102-in centre 124-ah exam an hmachhawn.

▶ Zirlai exam 18,102 zinga 12,878 an pass a, pass percentage hi 71.14% a ni.

▶ Compartment exam hmachhawn tur 62 an awm a, admission-ah an tlai loh nan compartment exam buatsaihsak thuai tum a ni.

▶ HSLC result complaint hun ni 15 chhung ni ṭhin kha ni sarihah pawh tawi a ni.

▶ Aizawl district-ah pass percentage a sang ber a, 82.96% a ni.

▶ Kumina pakhatna hian mark 485 a hmu a, nikuma pakhatna aiin mark 1-in a hmu sang zawk.

▶ Zirlai zawng zawng pass vekna sikul 107 a awm.

▶ Zirlai zawng zawng fail vekna sikul 14 a awm.

▶ HOTS question hi telh tam deuh deuh tura ruahman a ni.