Lok Sabha MP-in model village a tlawh

Lok Sabha MP C Lalrosanga chuan May 10, Nilaini khan SAGY Model Village atana a thlan Muthi khua a tlawh a, village development plan (VDP) hnuaia hmasawnna hnathawh hrang hrang a endik.

C Lalrosanga chuan, model village VDP a hlawhtlin theih nana nasa taka thawktu district level committee, VC, working group leh khawtlang mipuite inpekna fakawm a tih thu a sawi a, "In hnathawh hlawhtlinna tam tak ka hmuh hian ka lawm takzet. Covid vangin duh angin hna a thawh theih loh zawk a, khatiang hun harsa tawng chung pawha hetiang hmasawnna tam tak tihhlawhtlin a ni hi a lawmawmin, heng bakah hian a remchan dan angin hmasawnna tur thil dangte pawh tih tum chhoh zel a ni ang," a ti.

MP hian Muthi khuaa hmasawnna hna hrang hrang - MPLADS Fund hmanga kawt lai tih ên nana street light dah te, thlanmual in sak te, RD department hnuaia MGNREGS aṭanga Govt. LMM Middle School kawng PCC-a siam te, Tourism department hnuaia 'Development of Eco-Adventure Circuit Aizawl-Muthi' atana in sak mek te, Solar Pumping under Muthi Water Supply Scheme bakah, kawtchhuaha VC-ten village map an ziahte a tlawh.