Minister-in raltlante a tlawh

Minister Lalruatkima chuan Manipur buaina avanga Mizorama rawn tlanchhia, Saitual District Jail quarter-a awm mekte a tlawh a, an kianga an din tlat tur thu a hrilh.

Lalruatkima chuan raltlante chu kan unaute an nih thu sawiin, "An natna chu kan natna a ni a, an tawrhna pawh kan tawrhna a ni. Chutiang bawkin an hlimna leh lawmna pawh kan hlimna a ni. An kiangah kan ding tlat dawn a, kan kalsan lo ang. Zofate Jerusalem, Zoramah hian kan raltlante pawh thlamuang takin awm rawh u," a ti.

Kan unau Manipur, Burma leh Bangladesh amite'n harsatna an tawk mek tih sawiin Lalruatkima chuan, "A pawi kan ti tak zet. Mizorama rawn raltlan mekte a hnam angin kan lo dawnsawn a pawimawh hle," a ti a, sorkar, kohhran, NGO leh mipui zawng zawng ṭanrual a, , thu khat vuaa kan lo buaipui chu a ropui a tih thu a sawi.

Minister chuan Zofate hi ram hrang hrang - India, Burma leh Bangladesh-ahte ṭhendarhin kan awm tih sawiin, "Hei bakah hian India ramah pawh state hrang hrangah ṭhendarh kan ni. Zofa ṭhendarha awmte rorelna pakhat hnuaia awm hi kan nghakhlel em em a, Pathian engkim tithei zarah chu hun chu Zofate hian kan chuangkai ngei ang tih ka ring tlat a ni," a ti.