CYMA leh MZP-in pass-te lawmpui

Central YMA leh MZP chuan thuchhuah siamin, Mizoram Board of School Education (MBSE)-in High School Leaving Certificate Examination (HSLC) 2023 result a tihchhuaha pass zawng zawngte an lawmpui thu leh result ṭha taka tihchhuah a nih avanga MBSE chunga an lawmthu an tarlang.

CYMA chuan HSLC Result 2023 pass percentage 71.14% a ni leh nikum aia pass percentage a ṭha chu lawmawm an tih thu tarlangin, "HSLC pass thar zawng zawngte thinlung takin kan lawmpui a, hlawhtlinna chang rih lote pawh beidawng mai loa kal zel turin duhsakna kan hlan e," an ti.

MZP chuan ram leilungfa top ten-ah mi 14 an lang chu lawmawm an ti tak zet tih tarlangin, "Zirlai hlawhtlinna changa pawl 10 pass zawng zawngte MZP chuan thinlung takin a lawmpui takzet a ni," an ti a, la hlawhtling ve rih lote chu beidawng mai loa, rilru thar nen a lehpekah chuan hlawhtlinna chang ngei tura bei sauh sauh turin an ngen.