Mizoram sorkarin Lamka-ah buhfai a dah
Mizoram sorkar chuan Lamka, Manipur-a harsatna tawk mekte tan buhfai a ngaihtuah sak a, buhfai hi Dr L Thangmawia, MLA hoin May 10, Nilaini khan Lamka-ah dah a ni.
Zomi Students' Federation (ZSF) hruaitute chuan, Manipur buaina avangin Zo hnahthlakten Lamka an pan nasat thu leh buhfaiah harsatna an tawh ṭan thu Dr L Thangmawia an hrilh a, ani chuan Chief Minister leh Supply Minister hnenah a thlen nghal a ni.
Mizoram sorkar chuan Lamka-a Zofate tan hian buhfai quintal 200 an ruahman sak nghal a, a dah tur leh harsatna tawk mekte kan turin Dr. L Thangmawia, MLA hi Mizoram sorkar hotuten an tir chho a ni.
Lamka-a Zofate chuan hun harsa an tawh laia an mamawhte Mizoram sorkarin rang taka a lo ngaihtuahsak leh thawn chho mai loa MLA ngeiin a hmuna a tlawh chu lawmawm an tih thu Dr L Thangmawia hi an hrilh.
Zofate chuan ni tin mamawhte Mizoram kaltlanga lakluh a ngaih rih dawn thu te, Lamka-ah pawh mahni in chhuahsan raltlan tam tak an awm mek thu te, Mizoram aṭanga puihna leh ṭawngṭaisakna an dawn tawh zawng zawngah an lawmziate leh tun dinhmunah chuan khawvel hmun hrang hranga Zofate chu Pathian tih lohah chuan an innghahna an nih thute pawh Dr L Thangmawia hi an lo hrilh a ni.
Dr L Thangmawia chuan amah lo dawngsawngtute hnenah Mizoram mipuiin Manipur buai avanga Zo hnahthlakte tawrhna chu an tawrhna anga an ngaih thu sawiin, "Kohhran hoten an ṭawngṭaisak reng che u," a ti a, Mizorama tlawmngai pawl hrang hrangten anmahni pui tura theihtawp an chhuah mek thu a hrilh bawk.