Hnahthialah chaw nghei chhunzawm

Hnahthial Lungleng Veng chuan Hnahthial South VC-III siam thar chungchanga lungawi lohna an lantir chu an tihtàwp lailâwk hnuah nimin khan an chhunzawm a, mi eng emaw zatin chaw an nghei.

Mizoram sorkara Local Administration deparment (LAD)-in Hnahthial South-III VC a siam tharah Lungleng Veng zatve aia tam behtir a ni a, a zatve aia tlem hret Hnahthial South-I VC-ah behtir a ni thung a; VC pahniha Lungleng veng ṭhenkhat chu an duh lo a ni.

Lungleng veng khawtlang hian an veng chu ṭhen loin, Hnahthial South-III VC-a beh vek law law an phût a; an thil phûtah thu lawmawm hre loa State Election Commission-in VC inthlan hun a puan tâk avangin, nimin tlai aṭang khan Lungleng venga ṭhalaite chuan chawnghei an chhunzawm nghal.

Nimin zing dar 9:30 khan Lungleng JAC chuan an veng mipuite chu Zofa Rûnah van­tlang inkhawm an neihpui a, JAC chairman Rozamliana'n a kaihruai. He hunah hian, an veng ṭhalaite'n chaw an nghei mek laiin July 31, 2020 khan bial MLA leh minister Dr R Lalthangliana ngenna angin chawnghei tihtawp lailàwk a nih thu te, a hnuah thu lawmawm lam an hriat tak loh thute an sawi.

Lungleng JAC hruaitute chuan, an veng ṭhenawm Chanmari lamin Lungleng veng chu ṭhen hrim hrim an duh nia a lan thu sawiin, "Keini chuan South-III VC-a beh vek law law kan duh a, a theih loh pawhin South-I VC-ah min behtir law law rawh u, tia kan ngenna pawhin awmzia a awm thei ta lo a ni," an ti. Nimin zinga an punkhawmnaah hian Lungleng veng ṭhen chu a tàwp thlenga do an tum thu an tarlang bawk.