Police officer inkhawmpui Chief Minister-in a hmanpui; Economy chak takah Mizoram a siam theih - CM

Chief minister Zoramthanga chuan nimin khan PHQ GS Arya Mess-ah Mizoram Police Service Association (MPSA) General Conference vawi 13-na a hmanpui a; Mizoram chu economy chak takah siam theih a nih thu a sawi.

Zoramthanga chuan, Mizoram ṭhenawm ram leh state buai avanga Zo hnahthlakte tuamhlawm a ngaih avanga lungrual taka mi hrang hrangin thâ an thawh chu lawmawm a tih thu a sawi a, "Harsatna hrang hrang tawhte hi tumruhna nen hmachhawnin, Mizoram hi ram nuam leh entawntlak, economy chak takah a siam theih a ni tih hre rengin, mahni zawn ṭheuha tih tur leh tih theihte ṭhahnemngai taka thawh a pawimawh," a ti.

Mizoramin hun khirh tak tak a hmachhawn laia police-te inpekna leh hna an thawh ṭhinna chu chhua­nawm a tih thu sawiin CM Zorama chuan, "Police depart­ment leh department dangah pawh thawktu indaih lohna leh inthuamṭhat in mamawhnate ka hriatpui che u," a ti a, sorkar sum dinhmunin a zir tawk loh avanga a vaia tihhlawhlin theih ni rih lo mah se, ngaihtuah zui zel an nih tur thu a sawi.

Hripui leng avanga sorkar laipui aṭanga sum hmuh tur tam tak hmuh a nih loh thu sawiin Chief Minister chuan, "Kan budget innghahna chu tam tak kan hmuh tak loh avangin harsatna kan tawk a, hri leng boruak a ziaawm hnuah pawh sum hloh hi hmuh a nih chuàn si loh avangin sum indaih lohna chuan a chhunzawm chho zel. Chuti chung chuan sorkar chuan kawng hrang hrangin sum harsatna sukiang turin hma a la a, resource mobilization committee-te din a ni," a ti.

Thusawitu dang, Home minister Lalchamliana chuan hmasawn zel tur an nih thu sawiin, "Police ṭha ni tur chuan kawng engkima mi invawng, inthunun mi nih a pawimawh. Mahni thawhchhuah ni lo sum leh pai îtna lakah fihlim ang che u. Police tihchaka thuamṭhat hi sorkar pawhin a ngai pawimawh," a ti a, tunah sum lamah indiah lohna awm mahse a ṭul anga hma lak zel a nih tur thu a sawi.

MPSA khawmpui hi an presi­dent Zosangliana'n kaihruaiin, DGP Devesh Chandra Srivastava pawhin thu a sawi.

Chawhnu lamah rorel leh hruaitu thar thlan­­na neih a ni a, kum 2023-2024 hruaitu atan president-ah Zosangliana, sr. vice president-ah C Lalnunmawia, vice president-ah David H Lalthangliana, secretary-ah C Lalremliana leh Zonunsanga, fin. secretary-ah C Lalengliana leh treasurer-ah PC Lalṭanpuiate thlan an ni.