NRHM Director hlui N Pallai leh Health dept. EE hlui Sangliana eiruk vangin thiam loh chang
Special Judge (Prevention of Corruption Act) Dr HTC Lalrinchhana chuan nimin khan eiruk thubuaiah National Rural Health Mission (NRHM) mission director hlui Dr N Pallai leh Directorate of Health Service-a EE hlui Lalsangliana Chhakchhuakte thiam loh a chantir.
Special Court chuan Dr N Pallai leh Lalsangliana hrem an nih dan tur chu May 15, 2023 hian a puang dawn a, an pahnih hian jail-ah dah turin thutlukna a siam.
Dr N Palai leh Lalsangliana thubuai hi National Rural Health Mission-III Division-ten Civil Hospital, Aizawl tih changtlunna tur kum 2007-a cheng vbc. 10 Mizoram State Health Society an rawn pek tih chingpen thubuai a ni.
Mizoram sorkara Vigilance department Deputy Secretary-in April 20, 2012-ah CBI hnenah thubuai thehlutin, thubuai thehluhnaah chuan cheng vbc. 5.74 hman khaw loh anga tarlan a ni.
He thilah hian sum tihchingpen hunlaia NRHM mission director Dr N Pallai leh Directorate of Health Service EE Lalsangliana Chhakchhuak chu thubuai siam sak an ni a, an pawisa tihchingpen zata CBI-in an chhui chhuah chu cheng nuai 29.48 a ni.
Special Court chuan hun eng emaw chen he thubuai hi a ngaihtuah hnuah Dr N Pallai hi thubuai pathumah thiam loh chantirin, Lalsangliana Chhakchhuak chu thubuai pakhatah thiam loh a chantir thung.