Manipur buaina hi Meitei hoin tlangmite ram chhuhsak an tumna kal zel a ni - Lalduhoma

ZPM leader Lalduhoma chuan nimin khan Manipur buaina chungchangah thuchah a ti chhuak a, Manipur buaina chu Meitei hoin tlangmite ram chhuhsak an tumna kal zel niin a sawi.

Lalduhoma chuan, Manipur aṭanga Mizorama lo zinte lakah ILP phut a nih loh laiin, anni erawh chuan Mizote lakah ILP an phut tlat thung tih sawiin, "Hei hian Manipur sorkarin tlangmite laka an rilru put dan a tilang chiang hle. Tuna buaina hi thil thar a ni lo a, rei tak ata lo inmun tawh puak keh a ni," a ti.

Kum 2015-ah khan Manipur sorkar chuan 'The Protection of Manipur Peoples Bill, 2015' chu a lo pass daih tawh tih sawiin ZPM Leader chuan, "He Bill hian kum 1951 hnu lama Manipur-a lutte chu Manipur mi leh sa ni loa ngaih tur a ni, a rawn ti ta a ni," a ti a, tlangmite ram an chhuhsak theihna tur kawng an zawnna a nih thu a sawi.

Lalduhoma chuan The Manipur Land Revenue and Land Reforms (Seventh Amendment) Bill, 2015 pawh pass a nih thu sawiin, "He bill pawh hian tlangmite chenna rama Meitei hoin inhmun lo ram an neih theihna kawng a hawn sak. Bill-te hi dan pangngai anga sawiho leh bûk pawh ni loin, hmanhmawh takin minute 5 chhung lekin pass a ni," a ti.

ZPM Leader sawi danin, Manipur-ah hian Meitei ho chennaah district panga awmin, a ram zau lam 10% vel chauh an luah. Tlangmite chenna hi 90% vel laia zau niin district 11 a awm. Meitei ho hian tlangmite chenna rama in hmun lo ram an neih hi dan-in a phal si lo a, dan thar hmangin hma an la ta a ni.

Tuna buaina hi Meitei hoin tlangmite ram chhuhsak tuma an hmalakna kal zel kha a ni. Manipur BJP sorkar chuan tlangmite chenna ram zau tak chu reserved forest-ah leh wildlife sanctuary-ah a puang a, Churachandpur district chhunga hmun ṭhenkhat pawh wetland-ah a puang a ni.

Lalduhoma chuan Manipur chu Meitei ho ram chauh a ni bik lo tih sawiin, "Hmasang ata kan pipute delh ram a ni. Vanhnuailiana leh Manipur Raja-te kha an indo fo a, Meitei sipai sakawr chunga chuanga awmphaw inbelte lakah khan kan pasalṭhate an tawlh ngai lo. Ṭum khat phei chu Vanhnuailiana pasalṭhate khan silai 60 lai an chhuhsak a ni," a ti.