KHAWTHLIR
Thisen pe
KṬP, Champhai Zotlang North Branch chuan KṬP Half Year Meet pualin nimin khan an kohhran hall-ah Champhai District Hospital tan thisen unit 36 an pe a, petute mipa 35 leh hmeichhia pakhat an ni. Nursing School, Thingdawl pawhin nimin khan Nurses Day pualin Kolasib District Hospital-ah thisen unit 13 an pe a, petute mipa 10 leh hmeichhia pathum an ni.
CBSE Exam-ah MICE an ti tha
Central Board of School Education (CBSE) chuan nimin khan pawl 10 leh 12 exam result a tichhuak a, CBSE zawmtu Mizoram Institute of Comprehensive Education (MICE) zirlai exam 118 zingah fail an awm lo. MICE-a pawl 10 zirlai mi 17-te chu an pass vek a, distinction-ah mi panga an pass. Pawl 12-ah zirlai 101 exam-in, 100 an pass a, pakhat chu compartmental exam chance la nei a ni thung.
NE bialtu lo zin
Ministry of Tourism hnuaia North East India regional director Anil Oraw chu nimin khan Mizorama ni thum cham turin Aizawla lo thleng a, Tourism minister Robert Romawia Royte leh Tourism department hotute nen an inkawm. Regional Director chuan Mizoram tan an inhawng tih a sawi a; Yuva Tourism Club chawikan leh tourism-a eizawngte hamṭhatna turte an sawiho a ni.
Folkland a kang
Nimin chawhma dar 11:30 vel khan Folkland Park-a cafeteria, Falkland Vengah kangmei a chhuak a, mi pahnihin hliam tuarin ngaihtuahawm lutuk erawh an ni lo. Fire department chuan kangmei chhuah thu an dawn veleh Folkland Park hi panin, kangmei ṭhelh hna an thawk. Kangmei chhuah lai hian staff ho an meeting a, an hriat chuan a lo kang nasa hman tawh hle.
Tanpuina hlan
Aizawl Two Wheeler Taxi Association (ATTA) chuan Manipur-a Zo hnahthlak unaute chawmdawlna atana an stand tina vehbur an khawn tlingkhawm Rs 50,000 chu nimin khan Central YMA hruaitute hnenah an hlan.
Lehkhabu tlangzarh
MNF Media & Publicity dept.-in an buatsaih dy. chief minister Tawnluia department chana tun sorkar chhunga hmalakna hrang hrangte tarlanna lehkhabu chu nimin khan Tawnluia'n a pisa-ah a tlangzarh. Lehkhabu tlangzarh inkhawm hi MNF Media general secretary VL Krosshnehzova'n kaihruaiin, Dy. Chief Minister chuan a department chana hmalakna hrang hrang zinga lawmawm a tihzual ṭhenkhatte a sawi.
Hamṭhatna dawngtute tlawh
Governor Dr Hari Babu Kambhampati chuan nimin khan Hnahthial khawpuia PMAY(U) insak ṭanpuina kaltlanga in sak thar pahnih leh PMUY hnuaia a thlawna gas connection dawngtu chhungkaw pakhat a tlawh a, a lawmpui thu a hrilh. Larsap chuan, heng scheme hamṭhatnate hi a dawng tur leh a phute'n an dawn zung zung theih dan tur ngaihtuah turin sorkar hotute a chah.