Minister-in ramri véngtute a tlawh

Minister of state TJ Lalnuntluanga chuan nimin khan a ni thum nan a bial, Champhai South constituency chhunga HSLC Examination 2020-a pass-te hnenah lawmpuina a hlân leh. Zokhawthar lei chhak leh thlanga ramri vengtute tlawhin, ṭanpuina a pe bawk.

TJ Lalnuntluanga chuan, a biala lehkha­thiam an pun belh zel chu lawmawm a tih thu sawiin, "Beidawnna hi setana thlawhhmá a ni. Duh ang diak diaka kal theih loh hun a la awm ang a, chutih hunah chuan rilru fím leh ngaihtuahna zau zawk sên thiam a pawimawh dawn a ni," a ti.

Minister chuan, beidawng loa tumruhna nena chona hma­chhawn ṭhin tur leh ram leh khaw­tlang tana an ṭangkai theihna inzawt fo ṭhin turin zirlaite a chah a; mahni kutkea ding thei tura inzir tur leh chhungkua, khawtlang leh ram tana chhenfâkawm nih tum turin a fuih bawk. Dilkawn, Kelkang, Mualkawi, Melbuk leh Zokhawtharah HSLC pass-te hnenah dictionary bu pakhat ṭheuh a pe a ni.

TJ Lalnuntluanga hian Zokhawthar bul Ṭiau lei chhehvela ramri vengtu Champhaia YMA duty-te leh Zokhawthar task force-te a tlawh a; buhfai quintal 12.5 leh thosi lên eng emaw zat a hlân a ni. Minister chuan, mahni in lum chhuahsana ramri vengtute chu fakawm a tih thu a sawi.